“Зўрға ўзига келтиришди”. Қодиров шошилинч тарзда шифохонага ётқизилган – ОАВ

Чеченистон раҳбари Рамзан Қодиров 2025 йил 24 декабрдан 25 декабрга ўтар кечаси Москвада шошилинч тарзда шифохонага ётқизилган. Бу ҳақда унга яқин манбага таяниб, “Новая газета. Европа” хабар берди.

Нашр манбасининг сўзларига кўра, Қодиров Россия Президенти Владимир Путин раислигида ўтказилиши керак бўлган Давлат кенгаши йиғилишида иштирок этиш учун пойтахтга борган. Бироқ унинг соғлиғи кескин ёмонлашган ва у реанимобил орқали Россия Президенти ишлар бошқармасига қарашли Марказий клиник шифохонага етказилган. Бундай ҳолат учун захира режа кўзда тутилмагани сабабли, Давлат кенгаши Чеченистон вакилисиз ўтказилган.

“Москвада уни зўрға ўзига келтиришди, шундан сўнг у уйига қайтди ва шундан бери жамоатчилик олдида кўринмади”, дейди нашр манбаси.

Эслатиб ўтамиз, 2025 йил бошида Қодиров Грознийдаги “Аймеди” хусусий клиникасига ҳам ётқизилган. Шундан кейин унинг аҳволи ёмонлашишда давом этган. Буни Қодиров яқинда ўтказилган “тўғридан-тўғри мулоқот” чоғида билвосита тан олиб, жорий йилда расмий таътилга тўрт марта чиққанини айтган. Шунингдек, у ўзининг ёмон аҳволига ишора қилувчи белгиларни ҳам изоҳлаб берган. Хусусан, Чеченистон раҳбари, буни Украинадаги урушда иштирок этаётган чечен жангчилари учун хавотирлар билан изоҳлаган.

Шу билан бирга, йил давомида Қодиров бир неча бор ўзининг касаллиги ҳақидаги миш-мишларни рад этиб келган. Август ойида у “соғлом” эканини айтиб, ҳар куни йиғилиш ўтказишига ҳожат йўқлигини, “чунки иш тизимга солинганини” билдирган. Сентябрда эса соғлиги билан боғлиқ гаплар чиққанида ҳар сафар 50 марта турникда тортилишини айтган.

Айрим манбалар Қодировнинг буйраклари билан боғлиқ муаммолари бўлиши мумкинлигини билдирмоқда. Шунингдек, унда ошқозоности безининг некрози борлиги ҳақидаги тахмин ҳам мавжуд. Бироқ аниқ ташхис номаълум, чунки бу ҳақдаги маълумотлар қатъий яширилади.