Жапаров Тожикистон масаласида гаплашиш учун Лукашенкога сим қоқди

Бугун,  22 сентябрь куни Қирғизистон Республикаси Президенти Садир Жапаров Беларусь фуқароси Александр Лукашенко билан телефон орқали мулоқот қилди. 

Улар Қирғизистон-Беларусь икки томонлама ва кўп томонлама ҳамкорлигининг устувор йўналишларини муҳокама қилган. 

Қирғизистон-Тожикистон давлат чегарасидаги вазият юзасидан ҳам фикр алмашилган. 

Садир Жапаров ва Александр Лукашенко ўзаро манфаатли соҳаларда самарали ҳамкорликни давом эттиришга келишиб олгани айтилмоқда.

Қайд этилишича, суҳбат Қирғизистон томонининг ташаббуси билан бўлиб ўтган.

Қирғизистон ва Тожикистон чегарасида можаро

Қирғизистон ва Тожикистон ўртасидаги чегарадаги вазият 14 сентябрь куни Боткен вилоятидаги учта участкада чегарачилар ўртасида отишма бошланганидан кейин кескинлашди. Томонлар бир неча бор ўт очишни тўхтатиш бўйича келишиб олганига қарамай, келишувлар ҳар сафар муваффақиятсизликка учради.

Қирғизистон расмийлари Тожикистонни чегарага оғир ҳарбий техникани тортиб келишда ва Қирғизистон ҳудудини ўққа тутишда “барча мавжуд арсеналдан” фойдаланганликда айблади. Мамлакат Фавқулодда вазиятлар вазирлиги тўқнашув зонасидан 136 минг киши эвакуация қилингани, Боткен вилоятида фавқулодда ҳолат режими жорий этилганини ҳақида маълум қилди. 

Айни пайтда Тожикистон қирғиз кучларини Тожикистон чегарасидаги қатор аҳоли пунктларини “оғир қуроллардан” ўққа тутишда айблади. Ҳозирда икки давлат ўт очишни тўхтатиш ва қўшинларни чегара ҳудудидан олиб чиқиш бўйича келишувларга амал қилмоқда. Тўқнашувларни якунлаш учун Қирғизистон ва Тожикистон махсус хизматлари раҳбарлари протокол имзолади. Ҳужжат учта бандни ўз ичига олган.

Икки давлат чегарасида 70 га яқин баҳсли участкада белги қўйилмагани сабабли мунтазам равишда можаролар чиқиб туради. Умуман олганда, 2022 йил июль ойи ҳолатига кўра, мамлакат чегараларининг 972 километридан 600 километрга яқини келишилган.