Жанубий Кореядан қайтаётган Мелони Ўзбекистонга қўнди

Бугун, 19 январь куни Тошкент шаҳрида Ўзбекистон Республикаси Президенти Шавкат Мирзиёев пойтахтда қисқа фурсатга тўхтаган Италия Республикаси Бош вазири Жоржа Мелони билан учрашув ўтказди. Бу ҳақда Президент матбуот хизмати хабар берди.

Учрашувда Ўзбекистон – Италия стратегик шериклик муносабатларини янада мустаҳкамлаш ва кўп қиррали ҳамкорликни кенгайтиришнинг амалий жиҳатлари кўриб чиқилган.

Шунингдек, 2025 йилнинг май ойида Самарқандда олий даражада эришилган келишувларнинг изчил амалга оширилаётгани мамнуният билан қайд этилган. 

“Турли даражаларда фаол мулоқотлар давом этмоқда. Товар айирбошлаш ҳажми ва қўшма корхоналарнинг сони барқарор ўсиб бормоқда. Ҳудудлараро, шу жумладан, Ломбардия билан алмашинувлар ривожланмоқда. Ўзбекистон фуқароларининг тартибли меҳнат миграцияси учун квоталар ажратилди. Finopera, ANCI, Pietro Fiorentini, Danieli ва бошқа компаниялар билан ҳамкорликда йирик саноат кооперацияси лойиҳалари амалга оширилмоқда. Ўтган йил охирида Самарқандда Тушиа университетининг филиали очилди”, дейилади хабарда.

Маълум қилинишича, жорий йилда ташқи сиёсат идоралари стратегик мулоқоти ва ҳукуматлараро комиссиянинг йиғилишлари, шунингдек, иккинчи Ректорлар форумини ўтказиш режалаштирилган.

Тўқимачилик саноати, геология, энергетика, кимё, қурилиш материаллари, молия бозори ва бошқа устувор соҳалардаги қўшма лойиҳаларни илгари суришга алоҳида эътибор қаратилган.

Италияда Ўзбекистон, Ўзбекистонда эса Италия киноси кунларини ўтказиш тўғрисида келишувга эришилган. Ўзбекистоннинг навбатдаги Венеция биенналесида иштирок этиши ҳамда бу йил Миланда амалий санъат ва музей кўргазмаларини ўтказиш режалари қўллаб-қувватланган.

Бундан ташқари, учрашувда халқаро ва минтақавий кун тартиби юзасидан ҳам фикр алмашилган, якунда Ўзбекистон Президенти Шавкат Мирзиёев Италия Бош вазири Жоржа Мелонини Ўзбекистонга алоҳида ташриф билан келишга таклиф қилган.

Маълумот учун, кеча,18 январь Мелони расмий ташриф билан Корея Республикасига борган. Бугун, 19 январь куни Корея Республикаси Президенти Ли Чже Мён билан учрашган.

Эслатиб ўтамиз, олдинроқ Самарқанд шаҳрида бўлиб ўтган музокаралар якунида Ўзбекистон Республикаси Президенти Шавкат Мирзиёев ва Италия Республикаси Бош вазири Жоржия Мелони Стратегик шериклик муносабатларини мустаҳкамлаш тўғрисидаги қўшма декларацияни қабул қилганди.