Зеленский уруш вақтида сайловни ўтказишга тайёрлигини айтди, бироқ шарти бор

Украина Президенти Владимир Зеленский ҳарбий ҳолат даврида сайловларни ўтказишга тайёрлигини айтди.  Бу ҳақда у Британиянинг “Channel 4 News” телеканалига берган интервьюсида маълум қилди.

Унга кўра, уруш шароитида овоз беришга тўсқинлик қилаётган тўсиқларни енгиб ўтиш мумкин бўлса, сайловлар ўтказилади.

“Мана менинг жавобим: агар эртага қила олсам, эртага қилардим... Вазиятни ва қонунни ўзгартиришимиз керак”, дейди давлат раҳбари.

Зеленскийнинг қўшимча қилишича, президентлик сайловлари унинг хоҳишига кўра эмас, балки қонун талабига кўра қолдирилмоқда. Украина қонунчилиги Президентга эмас, балки бутун институтларга сайлов ўтказишни тақиқлайди.

Унинг айтишича, ишғол қилинган ҳудудларда сайловларни қандай ўтказиш масаласи қолган.

"Агар буни қилиш мумкин бўлса ҳам, босиб олинган ҳудудларни нима қилиш керак? Хорижда олти миллиондан ортиқ одам бўлса ва афсуски, онлайн сайловлар формати йўқ бўлса, сайловларни қандай ўтказиш керак?", дейди Зеленский.

Эслатиб ўтамиз, 2023 йилнинг октябрь ойидан бошлаб сиёсий доираларда Владимир Зеленский ва унинг жамоаси 2024 йил март ойида сайлов ўтказиш ниятида экани ҳақида доимий миш-мишлар тарқала бошлади. Айрим ҳукумат амалдорлари ҳам бу имкониятни тан олишган.

Бироқ, бу мамлакатда жуда кучли сиёсий кескинликни келтириб чиқарди. Зеленскийнинг кўплаб рақиблари сайловларни президентни ўзгартириш имконияти сифатида кўришган. Бундан ташқари, сайловда амалдаги давлат раҳбарини мағлуб этиши мумкин бўлган потенциал номзод ҳам бор эди: Украина Қуролли кучлари Олий Бош Қўмондони Валерий Залужний.