Зеленский уруш бошланганидан бери илк бор Озарбайжонга борди

Бугун, 25 апрель куни Украина Президенти Владимир Зеленский уруш бошланганидан бери илк бор Озарбайжонга ташриф буюрди. Бу ҳақда “Report” хабар берди.  

Қайд этилишича, Зеленский мамлакатга ишчи ташриф билан келган. Уни Озарбайжон Президенти Илҳом Алиев Габала шаҳрида кутиб олган. Ҳозирда икки лидер ўртасида якка тартибдаги учрашув бўлиб ўтмоқда.

Таъкидлаш жоиз, Владимир Зеленский Россия билан 2022 йилда бошланган урушдан сўнг илк бор Озарбайжонга борди. Унинг энг сўнгги ташрифи 2019 йил 16–17 декабрь кунлари амалга оширилган эди. Ўшанда Илҳом Алиев билан ўтказилган музокараларда бир неча муҳим келишувларга эришилган. Ҳар икки давлат бир-бирининг ҳудудий яхлитлигини қўллаб-қувватлашини билдирган: Озарбайжон Украина (Донбасс ва Қрим) масаласида, Украина эса Озарбайжон (Қорабоғ) масаласида ўз позициясини тасдиқлаган.

Энергетика соҳасида SOCAR компаниясининг Украинадаги фаолиятини кенгайтириш бўйича келишувга эришилган. Шунингдек, савдо ва логистика алоқаларини ривожлантириш, Украинада Озарбайжон савдо уйини очиш масалалари муҳокама қилинган.

Эслатиб ўтамиз, аввалроқ Путин ва Зеленский учрашуви қачон ўтказилиши ҳақида хабар берилганди. Россия Президенти матбуот котиби Дмитрий Песков Владимир Путин ва Украина Президенти Владимир Зеленский ўртасидаги учрашув фақат олдиндан келишувлар тайёр бўлгандагина ўтказилиши мумкинлигини маълум қилган.