Зеленский Россияни терроризм ҳомийси деб тан олишни сўраб чиқди

Украина Президенти Владимир Зеленский кеча, 27 июнь куни АҚШни Россияни терроризмнинг ҳомийси сифатида тан олишга чақирди. 

"Мен Америка Қўшма Штатларига Россияни терроризм ҳомийси сифатида тан олиш учун мурожаат қилдим", дейди Украина Президенти ўзининг навбатдаги видеомурожаатида.

У сўзида давом этаркан, ўзининг ушбу таклифини Германияда бўлиб ўтган G7 саммити иштирокчиларига айтганини билдирган. 

“Тегишли резолюция АҚШ Сенати қўмитаси томонидан маъқулланган ва қонуний қарор Давлат департаменти томонидан қабул қилиниши мумкин. Бундай ечим аниқ зарур ва бутун демократик дунё томонидан қўллаб-қувватланиши керак. Мен буни Германияда бўлиб ўтган Г7 саммити иштирокчиларига айтдим”, дейди уруш майдонига айланган Украина раҳбари. 

Июнь ойи бошида АҚШ Давлат департаменти АҚШ маъмурияти экспертлари Россия Федерациясининг Украинадаги воқеаларни ҳисобга олган ҳолда АҚШнинг терроризмга ҳомийлик қилувчи давлатлар рўйхатига кириш мезонларига мос келишини ўрганишда давом этаётгани ҳақида хабар берган эди. 

Россия Ташқи ишлар вазирлигининг расмий вакили Мария Захарова аввалроқ АҚШнинг Россия Федерациясини терроризмга ҳомийлик қилувчи давлат сифатида тан олиш ташаббусини “аҳмоқона чора” деб атади. Дипломат бу жавобсиз қолмаслигини қайд этди. 

Терроризмга ҳомийлик қилувчи давлатлар рўйхатини АҚШ Давлат департаменти тузади. У, Вашингтон фикрича, “халқаро террорчилик ҳаракатларини бир неча бор қўллаб-қувватлаган” давлатларни ўз ичига олиши мумкин. Америка маъмурияти рўйхатдаги шахсларга нисбатан санкциялар қўллаш нуқтаи назаридан кенг ваколатларга эга. АҚШ Ғазначилик департаменти ушбу юридик ва жисмоний шахсларга, шунингдек, рўйхатдаги мамлакатлар билан савдо қилувчи штатларга қарши чоралар кўриши мумкин. Давлат рўйхати кейинги чекловчи чоралар учун муҳим оқибатларга олиб келиши мумкин. 1979 йилдан бери Вашингтон маъмурияти ўз рўйхатига фақат оз сонли мамлакатларни қўшди. Ҳозирда фақат Эрон, Шимолий Корея, Куба ва Сурия АҚШда терроризмга ҳомийлик қилувчи давлатлар тоифасига киритилган.