Зеленский G7 саммити доирасидаги учрашувларини бошлаб юборди

Бугун, 20 май куни Украина Президенти Владимир Зеленский Хиросимада Буюк Британия ва Италия Бош вазирлари Риши Сунак ва Жоржия Мелони билан алоҳида-алоҳида учрашув ўтказди. Бу ҳақда у ўзининг Telegram-каналида маълум қилди.

"Японияда мен Буюк Британия Бош вазири Риши Сунак билан учрашдим. Буюк Британиянинг халқаро қирувчи самолётлар коалициясидаги етакчилиги учун миннатдорлик билдирдим", деб ёзган Зеленский.

Украина Президентининг аниқлик киритишича, у G7 саммитида иштирок этиш арафасида Сунак билан позицияларни келишиб олган ва мамлакатлар ўртасидаги муносабатларни ривожлантириш масалаларини муҳокама қилган. 

“Биз 14 май куни Буюк Британияда бўлиб ўтган музокаралар чоғида эришилган келишувларни келгусида амалга оширишни муҳокама қилдик”, дея қўшимча қилган Украина етакчиси.

Шунингдек, Зеленский саммит доирасида Италия Бош вазири Жоржия Мелони билан ҳам учрашган ва у билан ҳаво ҳужумидан мудофаа тизимини кучайтириш ва украиналик учувчиларни тайёрлаш ҳақида суҳбатлашган.

"Мен Италия Бош вазири Жорж Мелони билан учрашдим. Биз Италиянинг Украинани ҳарбий ва сиёсий қўллаб-қувватлаши ҳамда 13 майдаги Италияга ташрифнинг биринчи натижаларини муҳокама қилдик”, дейди Зеленский.

Айтиш жоизки, G7 саммити бошланишига бир неча кун қолганида ҳам оммавий ахборот воситаларида Украина Президенти Владимир Зеленскийнинг иштироки формати ҳақида турли тахминлар пайдо бўла бошлаганди. Дастлаб унинг онлайн тарзда сўзга чиқиши айтилган бўлса, кейинчалик Зеленский саммитда шахсан қатнашиши хабар қилинди. лаши хабар қилинган эди, кейин эса бориши айтилди. Кейин эса бу даъволар рад этилди. Киевнинг ўзи давлат раҳбарининг Хиросимага сафари ҳақида эълон қилмади.

Япония Ташқи ишлар вазирлигининг тушунтиришича, дастлаб Украина Президенти саммитда онлайн тарзда иштирок этиши керак эди. Аммо кейин Зеленский учрашувда шахсан иштирок этиш истагини билдирган. У бугун, 20 май куни Хиросима аэропортига Франция ҳукумати самолётида етиб келган.

Эслатиб ўтамиз, жорий йилнинг 13 май куни Зеленский Римда Мелони билан учрашганди. Музокаралар якунида у “Украина осмонини ҳимоя қилиш” бўйича муҳим қарорларга эришилганини айтди. Президент қандай қарорлар қабул қилинганига аниқлик киритмади. 14 майда эса Украина раҳбари Буюк Британияда Сунак билан музокаралар ўтказди ва у Лондон Киев ҳукуматини F-16 қирувчи самолётлари билан таъминлашга тайёр давлатлар коалициясини яратиш борасидаги саъй-ҳаракатларини қўллаб-қувватлашини айтди. Лондон, шунингдек, “яқин ойларда” Киев ҳаво ҳужумидан мудофаа тизимлари учун юзлаб ўқ-дорилар ва 200 км дан ортиқ масофага учувчи юзлаб ҳужумчи учувчисиз самолётларни олишини маълум қилди.