Европа Трампнинг Украинани ташлаб қўйишидан хавотирда – ОАВ

Европалик дипломатлар АҚШ Президенти Дональд Трамп Украинани қўллаб-қувватлашдан воз кечиб, Россия билан иқтисодий ҳамкорликка урғу беришидан хавотирда. Бу ҳақда “The Guardian” хабар берди.

Нашрнинг ёзишича, Европа етакчилари жорий йилнинг 19 май куни Трамп ва Россия Президенти Владимир Путин ўртасида бўлиб ўтган телефон суҳбатидан сўнг кўнгилсизлик ва ҳатто ғазаб ҳиссиётларини бошдан кечирган. Трампнинг бу суҳбатни тасвирлашдаги ҳурмат оҳанги ва АҚШ маъмуриятининг Россияга нисбатан санкцияларни кучайтиришга истак билдирмагани Европа учун “ёмон туш”дек туюлган – яъни АҚШнинг Украина можаросидан чекиниш эҳтимоли пайдо бўлган.

Нашр таҳлилига кўра, бу ҳолат Вашингтоннинг Россияга нисбатан позициясида юмшаш белгиларини кўрсатмоқда ва Европа Иттифоқи ичида хавотирли сигнал сифатида қабул қилинмоқда.

Бундан олдин Финляндия Президенти Александр Стубб Трампнинг Путиннинг ноаниқ позицияларидан чарчагани ва АҚШ Сенатининг Россиядан нефть харид қилувчи давлатларга нисбатан санкцияларни жорий қилишини кутаётганини билдирган эди. Бироқ бу умидлар ўзини оқламаган.

Трамп маъмурияти эса можарони ҳал қилиш фақат урушаётган томонларнинг ўзига боғлиқ эканини таъкидламоқда.

“Бу Европа иши эди ва шундайлигича қолиши керак. Бу бизнинг урушимиз эмас”, деган АҚШ вице-президенти Жеймс Дэвид Вэнс. 

Шунга қарамай, Трампнинг махсус вакили Кит Келлогг европаликларга АҚШ томонидан ишлаб чиқилган 20 банддан иборат тинчлик режаси ҳақида маълумот берганини айтган. Бу эса Трампнинг фақат икки томон келишиши керак деган баёнотига зид келади.

“Трамп аслида сулҳни хоҳлайди. У ўз сайловчиларига “солиқларингиз Украинага бекорга кетмаяпти” дейишни истайди. У Путинни тийишни, аммо Европанинг етакчилик қилишини истайди”, деган Келлогг.

Нашрнинг қўшимча қилишича, Трампнинг Путин билан илиқ муносабатда бўлиши, Россиянинг Иккинчи жаҳон урушидаги қурбонликларини эътироф этиши ҳам Европанинг хавотирларини баттар кучайтириб юборган.

Эслатиб ўтамиз, аввалроқ АҚШ Президенти Дональд Трамп жорий йилнинг 19 май куни Россия Президенти Владимир Путин билан бўлиб ўтган телефон суҳбатидан сўнг Европа етакчиларига Путин урушни тўхтатмоқчи эмаслигини, чунки у ғолиб бўлишга ишонишини айтганди.