ЕВРО-2020: Турнир қаерда ва қандай ўтказилади?

2020 йилнинг ёзида бўлиб ўтадиган Европа чемпионати футбол мухлислари учун махсус бўлиб қолиши кутилаяпти. Негаки, тарихда илк бор кўҳна қитъа чемпионати битта ёки иккита давлатда эмас, балки деярли бутун Европа бўйлаб ўтказилади.

Чемпионатнинг дастлабки режасига кўра, мусобақа 13 та давлатдаги шаҳарларда ўтказилиши керак эди. Улардан 12 шаҳарнинг ҳар бирида гуруҳ баҳсларининг учтадан ўйини ва нимчорак ёки чорак финал ўйинларининг битта баҳси ўтказиларди. Ўн учинчи шаҳарга эса ярим финал ва финал ўйинлари топширилиши мўлжалланган.

Аммо якуний қарорга кўра, ЕВРО-2020 чемпионати 12 шаҳарда ўтказиладиган бўлди. Бу борада мусобақани қабул қилиши керак бўлган Киев шаҳри якуний рўйхатга киритилмади. Бунга катта эҳтимол билан 2014 йилда Украинада содир бўлган Майдон воқеалари сабаб бўлган бўлиши мумкин.

Умумий миқдорда жами 19 стадион ЕВРО-2020 ни қабул қилиш учун ариза топширган эди. Киевдан ташқари, Минск, София, Қуддус, Скопье, Стокгольм ва Кардиф шаҳарлари ҳам якуний рўйхатдан тушириб қолдирилди.

ЕВРО-2020 ўйинларини қуйидаги шаҳарлар ўз майдонларида ўтказади:

Амстердам, Голландия: “Йохан Кройфф Арена” стадиони
Бильбао, Испания: “Сан-Мамес” стадиони
Бухарест, Руминия: “Арена Национал” стадиони
Будапешт, Венгрия: “Ференц Пушкаш” стадиони
Глазго, Шотландия: “Хэмпден Парк” стадиони
Дублин, Ирландия: “Дублин Арена” стадиони
Копенгаген, Дания: “Паркен” стадиони
Лондон, Англия: “Уэмбли” стадиони
Баку, Озарбайжон: “Олимпийский” стадиони
Мюнҳен, Германия: “Арена Мюнҳен” стадиони
Рим, Италия: “Олимпико” стадиони
Санкт-Петербург, Россия: “Санкт-Петербург” стадиони.

Ҳар бир гуруҳдаги ўйинлар учун иккитадан стадион ажратилади. А гуруҳи баҳсларига Рим ва Баку мезбонлик қилади. Мусобақанинг очилиш ўйини 2020 йил 12 июнда Римдаги “Олимпико” стадионида ўтказилиши белгиланган.

В гуруҳи учун Санкт-Петербург ва Копенгаген, С гуруҳи учун Амстердам ва Бухарест, D гуруҳи учун Лондон ва Глазго, Е гуруҳи учун Билбао ва Дублин, F гуруҳи учун Буҳарест ва Мюнҳен шаҳарлари мезбон сифатида танланган.

Бундан ташқари, гуруҳ мезбонлиги топширилган давлат терма жамоалари саралашдан ўтиб, Европа чемпионатида қатнашса, улар ўзлари мезбон бўлиши кутилаётган гуруҳдан ўрин олади. Масалан, Италия ЕВРО-2020 да қатнашадиган бўлса, тўғридан-тўғри А гуруҳидан ўрин эгаллайди. Россия эса В гуруҳига жойлашади.

Маълумот учун, турнирнинг ярим финал ва финал баҳслари Лондоннинг “Уембли” стадионида ўтказилади.