Ерни “қутқариш” учун мегабомба портлатиш таклиф қилинди
Бу қизиқ
−
17 Февраль 23081
Рочерстер технология институти ходими Эндрю Хаверли иқлим ўзгаришига қарши курашиш учун денгиз тубида 81 гигатоннали термоядровий бомба портлатишни таклиф қилди. Бу ҳақда “Arxiv” портали хабар берди.
“Портлаш океан тубидаги деярли 4 триллион тонна базальтни майда бўлакларга айлантиради ва бу табиий жараён орқали атмосферадаги карбонат ангидрид газини сўриб олишга ёрдам беради. Натижада сўнгги 30 йилдаги барча чиқиндилар йўқ қилинади”, дейди тадқиқотчи.
Олим портлашни Жанубий океандаги Кергелен платоси ҳудудида амалга оширишни таклиф қилган. Унинг фикрича, агар зарядлар 6-8 км чуқурликда жойлаштирилса, портлаш натижасида юзага келадиган босим радиацион ифлосланишни минималлаштиради ва экологияга бўладиган потенциал зарарни камайтиради.
Хаверлининг ҳисоб-китобларига кўра, ушбу лойиҳа тахминан 10 миллиард долларга тушади. Бу эса иқлим ўзгаришлари келтириши мумкин бўлган триллионлаб долларлик зарарга қараганда анча арзон.
Эслатиб ўтамиз, аввалроқ Америкалик олим Жеймс Ҳансен ва унинг ҳамкасблари глобал исиш тобора кучайиб бораётганини маълум қилган эди. Тадқиқотчиларнинг хулосалари илмий жамоатчилик орасида баҳсли бўлиб қолаётган бўлса-да, Copernicus дастури ҳисоб-китобларига кўра, 2025 йил январь ойи 2024 йилнинг шу ойига нисбатан 0,09 даража (0,16°F) иссиқ бўлган. 2024 йилнинг январи эса шу пайтгача кузатилган энг иссиқ январь бўлиб, ўртача ҳарорат саноатгача бўлган даврдаги кўрсаткичдан 1,75 даража (3,15°F) юқори бўлганди. Бундан ташқари, сўнгги 19 ойдан 18 тасида глобал ҳарорат халқаро келишувларда белгиланган 1,5 даража (2,7°F) чегарасига етган ёки ундан ошиб кетган.
Live
Барчаси
