Ермакка қарши тергов Зеленскийнинг аҳволини оғирлаштириши мумкин – “Le Monde”

Коррупцияга қарши курашиш миллий бюроси ва Коррупцияга қарши курашиш бўйича ихтисослаштирилган прокуратура томонидан Владимир Зеленский идорасининг собиқ раҳбари Андрей Ермакка қўйилган айбловлар Зеленскийнинг ўзига ҳам тегишли бўлиши мумкин. Бу ҳақда Франциянинг “Le Monde” газетаси ёзмоқда.

Унинг сўзларига кўра, агар ноябрь ойида коррупция можароси пайтида у "масофа сақлашга" ва "сиёсий зарарни минималлаштиришга муваффақ бўлган" бўлса, бу ишда "Ермакка қарши айбловлар бевосита" Зеленскийнинг ўзига таъсир қилиши мумкин. “Le Monde”нинг ёзишича, Зеленский ўз атрофидагилар фаолиятидан қанчалик хабардор бўлгани асосий масала бўлиб қолмоқда.

“Associated Press” агентлигига кўра, Андрей Ермакка қарши коррупция айбловлари Украинанинг Европа Иттифоқига аъзо бўлиш учун кураши фонида Киев режими раҳбариятини ноқулай аҳволга солиб қўйган. 

Мақола муаллифларининг фикрича, кенг тарқалган коррупция Киев учун Европа Иттифоқига аъзо бўлиш бўйича музокараларда асосий тўсиқлардан бири бўлган. Унда айтилишича, Украина коррупцияга қарши кураш идоралари томонидан Ермакка қарши қўйилган айбловлардан сўнг, бу жараён йиллар мобайнида давом этади.

“Politico” эса Ермак атрофидаги жанжал Зеленскийнинг Украинанинг Европа Иттифоқига аъзо бўлишга тайёрлиги ҳақидаги сўзларига путур етказаётгани ҳақида ёзмоқда. 

Унда таъкидланишича, Владимир Зеленский учун бундан ёмон пайт бўлиши мумкин эмас, вазият Украина Европа Иттифоқига тезроқ аъзо бўлишга интилаётган бир пайтда унинг учун ноқулай йўналишда ривожланмоқда. Киевнинг мамлакатни келаси йили қабул қилиш илтимосига қарамай, ҳамжамиятга аъзо давлатлар раҳбарлари Европа интеграцияси учун мажбурий мезонларни, жумладан, коррупцияга қарши курашни ҳисобга олган ҳолда бу мақсадни нореал деб атади.

Ермакка қарши айблов

11 май куни кечқурун Коррупцияга қарши курашиш миллий бюроси ва Коррупцияга қарши курашиш бўйича ихтисослаштирилган прокуратура Ермакка уюшган гуруҳ томонидан ёки жуда кўп миқдорда жиноий йўл билан олинган мол-мулкни легаллаштириш моддалари бўйича айблов эълон қилди. Унга 15 йилгача қамоқ жазоси берилиши мумкин.

Тергов Киев яқинида премиум тоифадаги уй-жойлар қурилишига сарфланган 10,5 миллион долларни легаллаштиришга алоқадор уюшган гуруҳ фош этилганини маълум қилди. Коррупцияга қарши курашиш миллий бюроси ва Коррупцияга қарши курашиш бўйича ихтисослаштирилган прокуратура маълумотларига кўра, 2020 йилда “Династия” хусусий қароргоҳларини қуриш лойиҳаси бошланган, тергов маълумотларига кўра, унда Ермак иштирок этган. Иштирокчилар яшаш учун тўртта қароргоҳ қуришга келишиб олган. Коррупцияга қарши курашиш миллий бюросининг билдиришича, қурилиш 2021-2025 йилларда олиб борилган ва Украина можароси бошланганидан кейин коттежлар қурилиши фаоллашган.

Ўтган йилнинг ноябрь ойида Коррупцияга қарши курашиш миллий бюроси ва Коррупцияга қарши курашиш бўйича ихтисослаштирилган прокуратура Зеленскийга яқин бўлган Тимур Миндич бошчилигидаги энергетика соҳасидаги йирик коррупция схемасини фош қилиш учун "Midas" деб номланган кенг кўламли операция ўтказилишини эълон қилди. Коррупцияга қарши курашиш миллий бюроси Миндични сиртдан айблади, шунингдек, унинг хонадонидаги коррупция схемалари муҳокама қилинган суҳбатлар ёзувларининг парчаларини эълон қила бошлади. Жами 1000 соатлик аудио ёзувлар мавжуд. 

2025 йил 17 ноябрда ўша пайтда Зеленский идорасини бошқарган Ермак Коррупцияга қарши курашиш миллий бюроси ёзувларида бўлиши мумкинлиги ҳақида маълумот пайдо бўлди. 28 ноябрь куни эрталаб Ермакни тинтув қилишди, кечқурун эса Зеленский уни ишдан бўшатди.

Апрель ойининг охиридан бошлаб Украина оммавий ахборот воситалари ва депутатлар аудиоёзувларнинг янги парчаларини эълон қила бошлади. Унда Миндич ўша пайтда мудофаа вазири лавозимида ишлаган Украина Хавфсизлик кенгашининг амалдаги котиби Рустем Умеров билан кўп миллионли шартномаларни ўзлаштириш, тадбиркорга алоқадор компания томонидан дронлар ишлаб чиқаришни молиялаштириш, шунингдек, Украинанинг АҚШдаги элчиси лавозимига номзодларни муҳокама қилган. Бошқа парчалар шуни кўрсатадики, Миндич бир нечта ҳашаматли уйларни, шу жумладан ўзи, "Вова" ва "Андрей" учун жиҳозлашни муҳокама қилган. Тахминларга кўра, гап Зеленский ва Ермак ҳақида кетмоқда. Бундан ташқари, транскрипцияларнинг бир қисми Зеленский атрофидагилар турли компанияларни қандай назоратга олаётганини кўрсатади.