Ерда магнит бўронлари бошланди 

Бугун, 12 февралдан Ерда кучли магнит бўронлари бошланди. Бу ҳақда "Метеоагент" хабар берди.

Билдирилишича, ушбу табиат ҳодисаси яна 2 кун – 13-14 февраль кунлари ҳам давом этади. 

Магнит бўронининг келиб чиқиш сабаби сифатида эса Қуёшда содир бўлган Х синфидаги чақнаши кўрсартилган. Бу қуёш чақнашларини ўз ичига оладиган синфлар орасида энг кучлиси ҳисобланади. 

Манба берган маълумотларга кўра, 12 ва 14 февралда 5 балли, 13 февралда эса 6 балли магнит бўрони кузатилиши кутилмоқда.

Магнит бўронлари сабаб алоқа ва космик кемаларнинг ишлашида носозликлар юзага келади. Шунингдек, бу об-ҳаводаги ўзгаришларга таъсирчан ва юрак-қон томир касалликларидан азият чекадиган одамларнинг соғлиғига салбий таъсир кўрсатади. Жумладан, бош оғриғи, ҳолсизлик, диққатнинг пасайиши, асабийлашиш кузатилиши мумкин.

Бундай пайтда камида 7-8 соат ухлаш маслаҳат берилган. Овқат рационидан ёғли ва аччиқ овқатларни олиб ташлаб, кунига камида 2 литр сув ичиш тавсия қилинади. Қаҳва миқдорини камайтириб, ўсимликлардан тайёрланган чой истеъмол қилиш керак.

Шунингдек, контрастли душ, эрталабки машқлар, тоза ҳавода юриш, югуриш магнит бўрони кузатилганида саломатлик учун фойдали бўлади.