ЕИ ва НАТО нафақат Россия, балки Хитой таҳдидига ҳам дуч келаётгани айтилди

Европа Иттифоқи ва НАТО нафақат Россия таҳдидига дуч келмоқда, балки Хитойдан ўз хавфсизлигига таҳдид солинаётганини ҳам кўрмоқда. Бу ҳақда 10 январь куни Еврокомиссия раҳбари Урсула фон дер Ляйен Шимолий Атлантика альянси ва ЕИ ўртасида ҳамкорлик тўғрисидаги декларация имзоланганидан кейинги матбуот анжуманида айтиб ўтди. 

“Европанинг хавфсизлиги сўроқ остида ва таҳдид остида. Россия таҳдидлари энг тўғридан-тўғри, аммо ягона эмас. Шунингдек, Хитой халқаро тартибни ўз манфаатлари йўлида ўзгартиришга тобора кўпроқ ҳаракат қилаётганига гувоҳ бўлмоқдамиз. Биз ўз барқарорлигимизни мустаҳкамлашимиз керак ва бу янги қўшма декларация билан биз ҳам ҳамкорликни кейинги босқичга олиб чиқмоқдамиз”, дейди у. 

НАТО Бош котиби Йенс Столтенбергнинг фикрича, Европа Иттифоқи ва НАТО Украинага ёрдам ҳажмини ошириши керак.

“НАТО ва Европа Иттифоқи Киевни қўллаб-қувватлаш учун бирлашди. Биз Украинага ёрдамимизни янада кучайтиришимиз керак”, дейди Столтенберг. 

“The New York Times” газетаси хабар қилганидек, НАТО давлатларининг учдан икки қисми Украинага қурол етказиб бериш имкониятларини тугатган. Нашр маълумотларига кўра, альянс давлатлари Киевга 40 миллиард долларлик қурол-яроғ топширган, бу Франциянинг йиллик ҳарбий бюджети билан тенг.

Эслатиб ўтамиз, 10 январь куни Европа Иттифоқи ва НАТО икки ташкилот ўртасидаги ҳамкорлик тўғрисидаги янги декларацияни имзолади ва уни Украинадаги можаро фонида “янги босқичга” кўтарди.

Декларация матнига кўра, НАТО Евро-Атлантика минтақасида жамоавий хавфсизликнинг асоси бўлиб қолмоқда, бироқ альянс, шунингдек, НАТО билан мос келадиган ва ташкилот имкониятларини тўлдирадиган фаолроқ Европа мудофааси қийматини тан олади.