ЕИ Қирғизистон банкларига санкция қўлламоқчи

Европа Иттифоқи Россияга қарши санкцияларни кенгайтириб, Қирғизистоннинг иккита банки – “Keremet Bank” ва “Капитал Банк Марказий Осиё” ОАЖни санкциялар рўйхатига киритишни таклиф этди. Бу ҳақда “Reuters” ҳужжат лойиҳасига асосланиб хабар бермоқда.

Таклифга кўра, чекловлар Россияга криптовалюта хизматларини кўрсатиш билан боғлиқ. Санкциялар тасдиқланса, банклар Европа Иттифоқи мамлакатлари компаниялари ва фуқаролари билан операцияларни амалга ошириш имкониятидан маҳрум бўлади. Рўйхатга Лаос ва Тожикистон банклари ҳам киритилиши мумкин, Хитойнинг иккита банкини эса рўйхатдан чиқариш таклиф этилмоқда.

Ушбу чоралар Европа ташқи алоқалар хизмати томонидан Еврокомиссия билан ҳамкорликда тайёрланган ва Европа Иттифоқи давлатларига тақдим этилган 20-сонли санкциялар пакетига киритилган. Пакетнинг кучга кириши учун иттифоққа аъзо барча мамлакатларнинг бир овоздан маъқуллаши зарур.

Европа Иттифоқи, шунингдек, Россия нефтини қайта юклашда иштирок этаётган учинчи давлатлар портларига қарши санкциялар жорий этишни таклиф қилмоқда. Санкциялар рўйхатига Грузиянинг Кулеви порти ва Индонезиянинг Каримун порти ҳам киритилиши мумкин. Бу Европа Иттифоқининг учинчи давлатлар портларига қарши илк бор чекловлар қўйиши бўлади.

Ҳужжатда тармоқ чекловлари, жумладан, G7 нарх чегарасидан Россия нефтини денгиз орқали ташишни тўлиқ тақиқлашга ўтиш кўзда тутилган. Бундан ташқари, металлар ва хомашё маҳсулотлари импортига тақиқларни кенгайтириш таклиф этилмоқда.

Алоҳида бандда санкцияларни четлаб ўтишга қарши курашиш механизмини қўллаш назарда тутилган.

Хусусан, Европа Иттифоқи Қирғизистонга металл кесиш дастгоҳлари ва овоз, тасвир ҳамда маълумотларни узатиш учун алоқа ускуналари, масалан, модем ва йўналтиргичларни етказиб беришни тақиқламоқчи.

Шахсий санкцияларни кенгайтириш доирасида рўйхатга Россиянинг 30 нафар жисмоний шахси ва 64 та компаниясини, жумладан, “Башнефт” ва бир қатор нефтни қайта ишлаш заводларини киритиш таклиф қилинмоқда.

Илгари Россияга қарши чекловларни четлаб ўтишда гумон қилиниб, бошқа давлатлар, жумладан, Қирғизистон компаниялари ҳам Европа Иттифоқи ва АҚШ санкциялари остига тушган эди. Чунончи, 2025 йил октябрида Европа Иттифоқи иккита банкни – “Толубай” ва “Евросиё жамғарма банки”ни санкциялар рўйхатига киритди. 2025 йил февралида эса аввал АҚШ рўйхатига киритилган “Keremet Bank” Буюк Британия чекловлари остида қолди. Шунингдек, Қирғизистон Республикасининг бир нечта компаниялари ҳам санкцияларга дучор бўлган.