Яна бир араб давлатида илк коронавирус ҳолати қайд этилди

Иорданияда коронавирусга чалинишнинг илк ҳолати қайд этилди. Бу ҳақида “Al Jazeera”  телеканали хабар бермоқда.

Аниқлик киритилишича, коронавирус Иорданияга Италиядан келган шахсда аниқланган. Бундан олдин, канал таъкидлаганидек, у бир неча кун карантинда бўлган. “Al Jazeera”нинг маълум қилишича, Иордания Соғлиқни сақлаш вазирлиги коронавирус фаол тарқалаётган мамлакатлардан келганларга 14 кун давомида карантин жорий қилган.

Февраль ойида Иордания ҳукумати коронавирус тарқалган Хитой, Жанубий Корея ва Эрон фуқароларини мамлакатга киришларини вақтинча тўхтатиб қўйган эди.

Аввалроқ, Коронавирус Европанинг яна иккита давлати – Андорра ва Португалияга кириб боргани ҳақида хабар берилган эди. 

Сўнгги маълумотларга кўра, жаҳонда коронавирусга чалинганлар сони 89 835 нафарга етди. Ушбу касалликдан 3061 киши вафот этди. 45 172 бемор шифо топган.

Коронавирус энг кўп тарқалган давлатлар: Хитой (80026 бемор – 2912 нафар вафот этган), Жанубий Корея (4335 – 26), Италия (1696 – 34), Эрон (1501 – 66), Япония (256 – 6).