Яман ҳукумати 9 йилдан буён ёпиқ бўлган автомагистрални очди

Яман Президент кенгаши аъзоси Султон ал-Арад 9 йилдан бери ёпилган Мариб-Сана автомобиль йўлининг қайта очилганини маълум қилди. Бу ҳақда “Анадолу” агентлиги хабар берди

Маълум қилинишича, Яман ҳукумати ҳусийларни ҳам уларнинг назорати остидаги ёпиқ йўлларни очишга чақирган. Чекловларни олиб ташлаш аҳолининг шундоқ ҳам оғирлашиб бораётган аҳволини енгиллаштиришга хизмат қилиши билан изоҳлаган. 

Айтилишича, бу қарор сиёсий ва ҳарбий етакчиларнинг маслаҳатига кўра қабул қилинган. Бундан ташқари, барча тўсиб қўйилган йўлларни, жумладан, мамлакат жануби-ғарбидаги Таиз шаҳрига олиб борувчи йўлни очиш муҳимлиги ҳам таъкидланган.

Маълумот учун, Мариб-Сана автомобиль йўли Ямандаги фуқаролик уруши сабабли 2015 йилда ёпилган эди. Эрон томонидан қўллаб-қувватланган “Ансоруллоҳ” ҳаракати 2014 йил сентябридан буён Яман пойтахти Сана ва мамлакатнинг бир қанча ҳудудларини назорат қилиб келмоқда. БМТ Қочқинлар бўйича Олий комиссарлиги маълумотларига кўра, фуқаролар уруши туфайли Яман аҳолисининг 73 фоизи (тахминан 23,4 миллион киши) инсонпарварлик ёрдамига муҳтож, яна 4,3 миллион киши ўз уйларини тарк этишга мажбур бўлган.

Сарвар Хуррамов