Яккасаройда кам таъминланган 30 оилага янги уйлар топширилди

Ўзбекистон Республикаси Президенти маслаҳатчиси Турсинхон Худайбергенов ва Тошкент шаҳар ҳокими Жаҳонгир Ортиқхўжаев бугун, 14 апрель куни Яккарсарой туманида бўлиб, аҳолининг ногирон, боқувчисини йўқотган ва уй-жойга муҳтож қатлами вакилларининг 30 нафарига янги уйларнинг калитларини топширдилар.

Аҳолининг турмуш даражасини ошириш, ижтимоий қўллаб-қувватлаш, хусусан, эҳтиёжманд оилаларнинг уй-жой билан боғлиқ шароитларини яхшилаш мақсадида, Тошкент шаҳрининг Яккасарой туманида қурилган замонавий типдаги уй-жойлар эгаларига топширилмоқда. Жумладан, тумандаги Шота Руставели кўчаси 142- ва 142-а уйлари оралиғида 2 та 4 қаватлик, жами 30 та хонадонга мўлжалланган замонавий уй-жойлар қурилиб, эгаларига топширилди.

Уйлар билан бир вақтда ташқи муҳандислик тизимлари - газ, электр, канализация ва ичимлик суви тармоқлари тўлиқ битказилган. Уйлар олдида болалар майдончалари ташкил этилиб, ҳудудда ободонлаштириш ва замонавий йўлакчалар барпо этиш ишлари олиб борилган.

Бундан ташқари, уйларнинг кираверишади 8 та, қуёш энергиясидан қувват оладиган, кечки пайт ёнадиган замонавий электр мосламалари ўрнатилган.

Эслатиб ўтамиз, ўтган ҳафта Сергели туманида 166 та боқувчисини йўқотган ва уй-жойга муҳтож оилаларга янги уйларнинг калитлари топширилган.