Яқин ойларда Burger King Ўзбекистонга кириши мумкин

Дунёдаги энг йирик ва машҳур фаст-фуд тармоқларидан бири Burger King яқин ойларда Ўзбекистонда пайдо бўлади. Бу ҳақда кеча, 18 апрель куни Президент Шавкат Мирзиёев ўтказган иқтисодий тебранишларнинг Ўзбекистон соҳа ва тармоқларига таъсирини юмшатиш чора-тадбирлари бўйича видеоселектор йиғилишида салқин ичимликлар ишлаб чиқарувчи International Beverages Tashkent таъсисчиси Шуҳрат Эргашев маълум қилди.

Шуҳрат Эргашев Президент билан мулоқотда компания Burger King билан келишувга эришганини, Ўзбекистонда фаст-фуд ресторанларини очиш учун лицензия олганини қайд этган.

“Биз 10 йил олдин уларнинг ортидан югуриб, Ўзбекистонга келишларини илтимос қилардик. Ҳозирги кунда улар билан келишиб олдик. Ўзбекистон Республикасига лицензиясини олдик. 2-3 ойда бизда Burger King номли компаниялар очилади. Бу нафақат Тошкент бўйича бўлади, улар бизга марказий офисни Тошкентда очиб, бутун Ўрта Осиёнинг лицензиясини беришни таклиф қилди”, деди у.

Шунингдек, Шуҳрат Эргашев хорижий инвесторлар янги бозорга киришдан олдин ушбу мамлакатда Burger King ёки McDonald’s каби брендлар бор-йўқлигига қизиқишини ва улар учун сармоя киритишда бу муҳим белги эканини қайд этган.

Эслатиб ўтамиз, мазкур йиғилишда 1 июлдан бошлаб бирорта товар экспортига чеклов бўлмаслиги эълон қилинганди. Фақат 86 та товар гуруҳига кирган хомашё ва ижтимоий аҳамияти юқори маҳсулотларга нисбатан экспорт божлари жорий қилинади.