Dohadagi vositachilar Isroildan G‘azo bo‘yicha yangi rejani kutmoqda – “Al Arabiya”

Qatar va Misr vositachilari Dohadagi maslahatlashuvlarda isroillik muzokarachilar tomonidan taqdim etilgan G‘azo sektoridan qo‘shinlarni olib chiqish rejasiga Isroildan o‘zgartirishlar kiritishini kutmoqda. Bu haqda manbasiga tayanib, Saudiya Arabistonining “Al Arabiya” telekanali xabar berdi.

Ism-sharifi oshkor etilmagan manbaga ko‘ra, vositachilar Isroildan G‘azo sektoridan qo‘shinlarni olib chiqish xaritalariga o‘zgartirish kiritishini kutmoqda. Uning ma’lumotlariga ko‘ra, Isroil bugun, 12 iyul yoki ertaga 13 iyul kuni yangilangan rejani taqdim etishi mumkin.

Avvalroq “Agence France-Presse” falastinlik manbalarga tayanib, Isroilning Falastin anklavida harbiy ishtirokini saqlab qolish istagi vositachilarning mojaro tomonlari bilan Qatar poytaxtida bo‘lib o‘tayotgan maslahatlashuvlarini murakkablashtirayotgani haqida xabar bergan edi. Agentlik manbalaridan biriga ko‘ra, kecha, 11 iyul kuni Isroil delegatsiyasi G‘azo sektoridan qo‘shinlarni olib chiqish xaritasini taqdim etgan, bu Falastin tomoniga ko‘ra, “faqatgina Isroil armiyasini qayta joylashtirish va guruhlash rejasidir”.

“Hujjat Isroil qo‘shinlari anklav hududining 40 foizdan ortig‘ida saqlanishini nazarda tutadi”, deya qo‘shimcha qildi manba.

6 iyul kuni HAMAS va Isroil Misr, Qatar va AQSH vositachiligida Dohada G‘azo sektorida o‘t ochishni to‘xtatish va anklavda garovga olingan isroilliklarni ozod qilish bo‘yicha kelishuvga erishishga qaratilgan muzokara jarayonini qayta boshladi.

8 iyul kuni Qatar Bosh vaziri maslahatchisi, Tashqi ishlar vazirligi matbuot kotibi Majid bin Muhammad al-Ansoriy muzokaralar hali boshlanmaganini, Qatar va Misr vositachilari kelishmovchiliklarni bartaraf etish va bo‘lajak muzokaralar asosini aniqlash maqsadida HAMAS va Isroil vakillari bilan maslahatlashuvlar o‘tkazayotganini aytdi. Uning qayd etishicha, G‘azo sektorida o‘t ochishni to‘xtatish bo‘yicha kelishuvlarga erishish vaqt talab etadi.