Ўзбекистоннинг олтин-валюта захиралари рекорд даражага етди

Ўзбекистоннинг олтин-валюта захиралари бир ойда қарийб 5 миллиард долларга яқин қийматда ошди. Бу ҳақда Марказий банк эълон қилган статистик рақамларда кўрсатилган.

2025 йил 1 октябрь ҳолатига кўра, Ўзбекистон олтин-валюта захираларининг 44,2 миллиард долларлик қисми олтин ҳиссасига тўғри келади (августда бу 40 миллиард доллар эди), қолган қисми эса хорижий валюта ва қимматли қоғозларда сақланади.

Таққослаш учун, 2024 йилнинг шу даврида захиралар қиймати 41,1 миллиард доллар бўлган, яъни бир йил ичида улар 13,9 миллиард долларга ошган. Бу ўсишнинг катта қисми – 12,4 миллиард доллар – олтин нархининг кескин кўтарилиши ҳисобига юз берган.

“Bloomberg” маълумотларига кўра, 2025 йил бошидан бери бир унция (31,1 грамм) олтин нархи 2,6 минг доллардан 4 минг доллардан ошган, яъни деярли 50 фоизга қимматлаган.

Шу билан бирга, олтин захирасининг қиймати ошган бўлса-да, ҳажми бироз камайган. 1 октябрь ҳолатига кўра, захираларда 11,6 миллион унция (409,1 минг тонна) олтин мавжуд. Августда бу кўрсаткич 11,8 миллион унция, сентябрь бошида эса 12,3 миллион унция бўлган.

Статистика қўмитаси маълумотларига кўра, 2025 йил январь-август ойларида Ўзбекистон 22,98 миллиард долларлик товар ва хизмат экспорт қилган, шундан 8,42 миллиард доллари (36,7%) олтин экспорти ҳиссасига тўғри келган — бу мамлакат тарихидаги энг юқори кўрсаткич ҳисобланади.