Ўзбекистоннинг ичимлик суви захираси ҳажми маълум қилинди

Ўзбекистонда 97 та ер конида 64 миллион куб метр умумий сув захиралари мавжуд. Бу ҳақда кеча, 3 декабрь куни ўтказилган матбуот анжуманида Давлат геология қўмитаси вакили Расулжон Бегматов айтиб ўтди.

Бу сув захиралари асосан Тошкент, Самарқанд, Сурхондарё, Наманган Андижон ва Фарғона вилоятларида тарқалган. Аммо Хоразм вилояти ва Қорақалпоғистон Республикасида чучук сувлар деярли мавжуд эмас. Бухоро ва Навоий вилоятларида ўртача сув захиралари бор. Энг катта муаммо ҳам мамлакатдаги сув захираларининг тенг тарқалмаганида.

Бегматовнинг айтишича, таҳлиллар 2025 йилга бориб ер юзидаги давлатларнинг ярмидан кўпида сув тақчиллиги юзага келишини кўрсатмоқда. 2050 йилда эса бу кўрсаткич дунё аҳолисининг 3/4 қисмига тўғри келиши тахмин қилинмоқда.

“Дунёда бўлгани каби республикамизда ҳам сув ресурслари чекланган. Чучук сув умумий сув ресурсларининг 8 фоизини, ичимлик сувларининг эса 67 фоизини ташкил этади.

Мамлакатда аҳоли ичимлик суви таъминоти учун 2019 йилда 161,4 минг куб метр/сутка, яъни 950 минг кишига етарли миқдордаги чучук сув захираси тасдиқланган. 2020 йилда 193 минг куб метр/сутка, яъни 1 млн 140 минг кишига етарли сув захиралари тасдиқланиши кутилмоқда.

Бугунги кунда аҳоли жон бошига сувдан фойдаланиш меъёри суткасига 115-240 литр бўлиб, бу дунёдаги ўртача кўрсаткичдан паст ҳисобланади. Мисол учун, Бирлашган Араб Амирликларида кунига 700, Россияда 400, АҚШда 200, Германияда эса 130 литр сув суткалик нормани ташкил қилади”, дейди қўмита расмийси.

Ичимлик суви танқислиги бўйича кўрсаткичлар яқин йилларда ошиб бориши тахмин қилинаётгани айтиб ўтилди.

Негаки, Ер шарининг учдан икки қисми сувликлардан иборат. Бунинг 97 фоизи шўр сув, 3 фоизи чучук сувдир. Шунинг ҳам 2 фоизи музликлардаги сувлар ҳисобланади.