Ўзбекистонлик машҳур ММА жангчиси Суперлига клуби директори бўлди

Футбол бўйича Навоийнинг “Қизилқум” жамоаси директори лавозимига ММА жангчиси Амин Эргашев тайинланди. Бу ҳақда клуб Ахборот хизмати хабар берди.

Манбага кўра, кеча, 10 июнь куни “Қизилқум” клуби раҳбариятида қатор тайинловлар амалга оширилган. Шу пайтгача жамоа бош директори вазифасини бажариб келаётган Алишер Холиқов ўрнига аралаш яккакураш бўйича Европа чемпиони Амин Эргашев тайинланган.

Алишер Холиқов эндиликда жамоанинг спорт директори, шу вақтга қадар ушбу лавозимда ишлаб келаётган Воҳид Шодиев эса техник директор лавозимида фаолият олиб бориши белгиланган.

Маълумот учун, Амин Эргашев 1986 йилда Навоий вилоятининг Кармана туманида туғилган. У шу вақтга қадар спортнинг ММА (аралаш яккакураш) тури бўйича профессионал тарзда шуғулланган. Эргашев фаолияти давомида 17 та жанг ўтказиб, уларнинг 13 тасида рақибларини мағлубиятга учратган. Қолган 4 тасида эса имкониятни бой берган.

Навоийнинг “Қизилқум” жамоаси Суперлиганинг ортда қолган 12-туридан сўнг 6 очко жамғариб, 13-ўринда бормоқда.

Муҳсинжон Умурзоқов