Ўзбекистондаги кибержиноятларнинг 90 фоизи хориждан амалга оширилмоқда 

Ўзбекистонда содир этилаётган кибержиноятларнинг 90 фоизи чет давлатлардан туриб амалга оширилмоқда. Бу ҳақда Ички ишлар вазири ўринбосари полковник Рамазон Ашропов Ўзбекистон аҳолисига қилган мурожаатида сўз очди.

Унинг билдиришича, бугунги кунда содир этилаётган деярли ҳар иккита жиноятнинг биттаси ахборот технологиялари орқали амалга оширилмоқда. Хусусан, Ўзбекистондаги кибержиноятларнинг 90 фоизи айнан чет давлатлардан туриб, трансчегаравий хусусиятда амалга оширилмоқда.

“Очиқ айтиш лозим: бу турдаги жиноятларга қарши курашиш фақатгина ҳуқуқни муҳофаза қилувчи органлари томонидан олиб борилса, кутилган натижага эришиб бўлмайди. Чунки фирибгарлар асосан одамларнинг соддалиги, бепарволиги ва рақамли саводхонлиги етарли эмаслигидан фойдаланмоқда. Бугун бутун жамиятнинг, жамоатчиликнинг кучи, сиз-у бизнинг ҳамкорлигимиз керак. Ҳар бир фуқаро, ҳар бир ота-она, муаллим, маҳалла фаоли, зиёли ўз атрофдагиларга, фарзандларига, шунингдек, кексаларга киберхавфсизлик қоидаларини тушунтириши, шунингдек, оддий қилиб айтганда, тарғиботчига айланиши зарур”, дейди Рамазон Ашропов ўз мурожаатида.

У ҳаммадан кундалик ҳаётда қуйидаги қоидаларга амал қилишни ва уларни яқинларга етказишни сўрган:

• Биринчидан, ижтимоий тармоқларда келган шубҳали ва номаълум файлларни, айниқса APK форматидаги файлларни очмаслик ва юклаб олмаслик. Ҳатто у яқин инсондан келган бўлса ҳам;
• Иккинчидан, нотаниш рақамлардан келган ва ўзини турли идора ходими деб таништирган шахсларнинг гапига соддалик билан ишонмаслик. Ҳеч қачон телефон орқали код ёки пароль сўралмайди;
• Учинчидан, пулни қисқа вақт ичида бир неча баробар кўпайтириб бераман деган турли онлайн ва сохта платформалар тузоғига тушиб қолмаслик;
• Тўртинчидан, онлайн савдоларда сотувчининг ишончлилигини билмасдан туриб, олдиндан тўловни амалга оширмаслик;
• Бешинчидан ва энг муҳими: банк картасининг пин-кодини ҳамда телефонга келган SMS-кодни ҳеч қачон ва ҳеч кимга айтмаслик.

Эслатиб ўтамиз, аввалроқ Тошкент шаҳрининг Шайхонтоҳур туманида фуқароларни “Акция ғолиби бўлдингиз” дея алдаб, уларнинг кредит ва микроқарз маблағларини ўзлаштирган ноқонуний колл-марказ – “кибербункер” фаолияти фош этилганди.