Ўзбекистонда яшашни хоҳламаганлар Украинага қарши жанг қилмоқда – Александр Бастрикин

Россия Тергов қўмитаси раиси Александр Бастрикин баъзи сабабларга кўра, Ўзбекистонда, Тожикистонда ва Қирғизистонда яшашни хоҳламаган 20 мингдан ортиқ фуқаро Украина махсус операцияси таркибида фронтда жанг қилаётганини маълум қилди. Бу ҳақда Тергов қўмитаси раиси Санкт-Петербургдаги халқаро ҳуқуқ форумида сўз очди.

Маълум қилинишича, ўз чиқиши давомида у мигрантлар ва уларнинг жиноятчилиги ҳақида бир нечта асосий масалаларни кўтарган.

Унинг сўзларига кўра, 2025 йилнинг январь-март ойларида мигрантлар Россияда ўтган йилнинг шу даврига нисбатан 15 фоиз кўпроқ жиноят содир этган. 2024 йилда эса Россияда мигрантлар жиноятчилиги деярли 1 фоизга камайган.

Қолаверса, 2024 йилда Россия Тергов қўмитаси миграция соҳасидаги мансабдор шахсларнинг жиноятлари бўйича 918 та жиноий иш қўзғатган.

Бастрикин миграция муҳити радикализацияси ҳақида гапирган ва кўплаб мигрантлар Россия жамиятига интеграциялашишни хоҳламаётганини таъкидлаган. У барча мигрантлар учун мажбурий биометрик рўйхатга олишни жорий этишни таклиф қилган.

Шунингдек, у мигрантларнинг оила аъзолари Россияда яшашига қарши чиққан ва мигрантлар учун уй-жой, тиббий суғурта ва тиббий хизматлар иш берувчилар томонидан таъминланиши кераклигини таъкидлаган.

Ўз нутқи давомида Бастрикин миграция жараёнларини назорат қилишнинг муҳимлигини таъкидлаб, Тергов қўмитаси бу йўналишда иш олиб бораётгани ва мигрантлар сиёсатини кучайтиришни режалаштираётганини билдирган.

Эслатиб ўтамиз, аввалроқ Украина Мудофаа вазирлиги ва Бош разведка бошқармаси кўмагида ташкил этилган “Хочу жить” (“Яшашни хоҳлайман”) лойиҳаси Украинага қарши урушда қатнашиш учун Россия Қуролли кучлари билан шартнома имзолаган 1110 нафар Ўзбекистон фуқаросининг исм-шарифини эълон қилган эди. Нашр этилган рўйхатда камида 109 кишининг ўлгани айтилганди. Уларнинг энг кичиги 21 ёшга тўлмаган, энг ёши каттаси эса 62 ёшда бўлган.