O‘zbekistonda “Yangi avlod” bog‘chalari tashkil etiladi

O‘zbekistonda “Yangi avlod” nomli davlat bolalar bog‘chalari tashkil etiladi. Bu haqda bugun, 4 fevral kuni Prezident Shavkat Mirziyoyev maktabgacha ta’lim tizimini yanada rivojlantirish bo‘yicha yangi takliflar bilan tanishishi chog‘ida ma’lum qilindi. 

Maktabgacha ta’lim bolalarning aqliy, ijtimoiy va ma’naviy rivojlanishida juda muhim bosqich hisoblanadi. So‘nggi yillarda bu sohada katta ishlar qilinib, bolalar bog‘chalariga qamrov 78 foizga yetgan. Endi bu ko‘rsatkichni 80 foizga yetkazish rejalashtirilmoqda.

Hozirda ayrim tuman va shaharlarda bog‘cha qamrovi past, shuningdek, ko‘plab tarbiyachilarning ma’lumoti yetarli darajada emas. Shu sababli maktabgacha ta’lim tizimini yangi bosqichga olib chiqish zarurati tug‘ildi.

Yangi tartibga ko‘ra, bir yillik maktabga tayyorlov guruhlari majburiy bo‘ladi va u maktab ta’limining birinchi bosqichi hisoblanadi. Bu bolalarni maktabga yaxshiroq tayyorlashga xizmat qiladi. Ta’lim jarayonida o‘yin orqali o‘qitish usuli joriy etilib, bolalarning qiziqishi va qobiliyatlari inobatga olinadi.

Shuningdek, “Yangi avlod” nomli davlat bolalar bog‘chalari tashkil etiladi. 2026–2028 yillarda har bir hududda 120 o‘rinli bunday bog‘chalar ochiladi va ularning tarkibida bolalarni rivojlantirish markazlari bo‘ladi. Bu bog‘chalarda qo‘shimcha rahbar va tarbiyachi-yo‘riqchilar ishlaydi. Rahbar va pedagoglarga oylik maoshiga qo‘shimcha 20 foiz ustama to‘lanadi.

Nodavlat (xususiy) bog‘chalarga ham maktabga tayyorlov guruhlarini ochishga ruxsat beriladi. Bu raqobatni kuchaytirib, bolalar qamrovini oshirishga yordam beradi.

Pedagog kadrlar tayyorlashga ham katta e’tibor qaratiladi. 2026–2027 o‘quv yilidan boshlab pedagogika oliygohlarida ta’lim dasturlari xalqaro tajribaga moslashtiriladi. O‘rta maxsus ma’lumotli tarbiyachilar uchun esa ishlab turib oliy ma’lumot olish imkoniyati yaratiladi.

2027–2028 yildan boshlab maktabga tayyorlov guruhini bitirgan bolalarga elektron sertifikat beriladi va bu ma’lumot maktab hujjatlarida qayd etiladi.

Xususiy bog‘chalarni qo‘llab-quvvatlash uchun ham bir qator imtiyozlar joriy etiladi. Qamrov past bo‘lgan hududlarda:

davlat yerlarida ochilgan bog‘chalar 30 yilgacha ijara to‘lamaydi;

har bir bola uchun davlat tomonidan subsidiya beriladi;

150 o‘rinli xususiy bog‘chalar uchun imtiyozli kreditlar ajratiladi;

tarbiyachilarning ish haqi uch yil davomida davlat tomonidan qoplab beriladi.

Bundan tashqari, yangi uylarning birinchi qavatida ochilgan xususiy bog‘chalarga ham shu imtiyozlar tatbiq etiladi. 2030 yilgacha yirik xususiy bog‘chalar uchun ijtimoiy soliq bo‘yicha yengilliklar beriladi.

Prezident bu takliflarni puxta ishlab chiqish va bosqichma-bosqich amalga oshirish orqali maktabgacha ta’lim sifatini oshirish muhimligini ta’kidlagan.

Jamshidbek Amirov