Ўзбекистон ва яна 6 давлат разведкаси афғон масаласи бўйича баёнот қабул қилди  

Олам 7177
image

Эрон, Қозоғистон, Хитой, Покистон, Россия, Тожикистон ва Ўзбекистон разведка хизматлари халқаро ташкилотлар ва жаҳон ҳамжамиятини афғон муаммоси борасида ягона ёндашувни шакллантиришга чақирди. Бу ҳақда разведка хизматлари вакилларининг Душанбедаги учрашуви якунлари бўйича қабул қилинган баёнотда сўз боради.

“Учрашув иштирокчилари халқаро ташкилотлар ва манфаатдор давлатларни Афғонистон муаммосини ҳал қилишда ягона ёндашувни ишлаб чиқишга, бу мамлакатда қонун ва тартибни ўрнатишга, инклюзив ҳукумат тузишга, таранглик ва зўравонликнинг янада кучайишига йўл қўймасликка, халқаро терроризмга қарши биргаликда кураш олиб боришга чақирди”, дейилади баёнотда.

7 давлат разведка вакиллари кўп сонли қурбонларга сабаб бўлаётган Афғонистондаги терактлар ва бошқа кўплаб зўравонлик ҳаракатлари давом этаётган оғир вазиятга эътибор қаратган. 

“Мамлакатда содир бўлаётган мураккаб жараёнлар туфайли турли миллат вакилларининг ёш авлод вакиллари халқаро террористик ташкилотларга жалб қилинаётгани қайд этилди”, дейилади баёнотда.

Учрашув иштирокчиларининг таъкидлашича, халқаро террорчилик ташкилотларининг фаолияти Афғонистон давлатчилигига таҳдид солмоқда. Шу нуқтаи назардан, йиғилиш иштирокчилари мамлакатдаги барча этник, ижтимоий ва конфессиявий гуруҳларнинг манфаатларини ҳисобга олган ҳолда инклюзив ҳукумат тузишнинг муҳимлиги ва зарурлигини қайд этган.

“Афғонистондаги вазиятни ҳал қилиш учун учрашув иштирокчилари аъзо бўлган халқаро ташкилотлар платформаларидан фойдаланиш керак”, дея хулоса қилди махсус хизмат вакиллари.

Эслатиб ўтамиз, Тожикистон Миллий хавфсизлик қўмитаси бошлиғи Саймўмин Ятимов Мустақил Давлатлар Ҳамдўстлигига аъзо мамлакатларнинг хавфсизлик ва разведка хизматлари раҳбарлари йиғилишида ўқиб эшиттирган Афғонистон бўйича маърузасида ҳар куни 500-600 қочқин афғондан тожик томон чегарани кесиб ўтишга уринаётгани, қурол ва наркотик моддалар оқими кучайиб бораётгани ҳақида ахборот берганди. 

Фаррухжон Муродқулов
Мақолага баҳо беринг
Баҳолаганлар: 192
Рейтинг: 3
t
×