“Uzbekistan Airports” Антикоррупция агентлигига эътироз билдирди

Аввалроқ “Uzbekistan Airports” АЖ “Давлат харидлари тўғрисида”ги Қонуннинг 34-моддаси талабини бузгани ҳақида хабар берган эдик. Акциядорлик жамияти 2023 йил 7 февраль куни 4,3 млрд сўмга жиҳозлар харид қилиш бўйича ўтказилган давлат харидини амалга оширишда рақобатга зид ҳолатга йўл қўйган.

Коррупцияга қарши курашиш агентлигининг ушбу маълумотига эса “Uzbekistan Airports” АЖ эътироз билдириб чиқди. 

Унга кўра, қонунбузилиш ҳолатига йўл қўйилган танлов ауцион тугагунга қадар бекор қилиниб бўлинган ва лот тегишли равишда электрон платформадан олиб ташланган ҳам.

“Танловни бекор қилиш қонун бузилишининг олдини олиш учун профилактик чорага айланди. Шу муносабат билан Коррупцияга қарши курашиш агентлигининг axborot xabari нотўғри талқин қилиниши мумкин”, дейилади жамият муносабатида.

“Uzbekistan Airports” АЖнинг воқеага аниқлик киритишича, жорий йилнинг 7 февраль куни etender.uzex.uz электрон платформасида умумий қиймати 4,3 миллиард сўм бўлган шахсий компьютерлар харид қилиш бўйича энг яхши таклифлар (лот Но 23120012228252) танлови эълон қилинган.

13 февраль куни эса “Uzbekistan Airports” АЖга Ўзбекистон Республикаси Коррупцияга қарши курашиш агентлигидан ушбу лот бўйича техник топшириқда процессорининг бренди/маркаси кўрсатилганлиги, бу эса Ўзбекистон Республикаси “Давлат харидлари тўғрисида”ги ва Ўзбекистон Республикасининг “Рақобат тўғрисида”ги қонунлари талабларини бузиш ҳисобланиши тўғрисида огоҳлантириш хати келиб тушган. 

Шундан сўнг, Коррупцияга қарши курашиш агентлигининг кўрсатмаси доирасида юқоридаги танлов бекор қилинган.

“Шу билан бирга, etender.uzex.uz веб-сайтида компьютер техникасига лотлар жойлаштиришда бренд, маркани кўрсатиш мажбурий ҳаракат эканлигини алоҳида таъкидлаш лозим. Муайян процессор брендини танламасдан, лотни кимошди савдосига қўйиш техник жиҳатдан мумкин эмас. Ушбу тартиб Биржа томонидан ташкил этилган бўлиб, бу ҳақда Коррупцияга қарши курашиш агентлигининг масъул ходими хабардор қилинган”, дейилган “Uzbekistan Airports” АЖ Ахборот хизмати тақдим этган маълумотда.

Эслатиб ўтамиз, аввалроқ “Uzbekistan Airports” АЖ такси хизматининг ишга туширилиши бўйича Рақобатга қарши курашиш агентлиги билан ҳам зиддиятга боргани ҳақида хабар берган эдик.