Ўзбек ўзбекнинг бошини “еди”. Жасаднинг танаси бўлиб ташланган!

Туркияда ўзбекистонлик аёлнинг бошсиз жасади чиқинди контейнеридан топилди. Унинг  боши эса бошқа кўчага, чамадонга солиб ташлаб кетилган. Мазкур жиноятни содир этишда ўзбекистонлик фуқаролар гумонланиб қўлга олинди. Ўзбекистонлик муҳожир аёлнинг ваҳшийларча ўлдирилиши ортидан Туркияда минглаб аёллар норозилик намойишига чиқди.  Яқин дақиқалар ичида ушбу мудҳиш жиноят тафсилотлари ҳақида Qalampir.uz батафсил маълумот беради.

Ваҳший қотиллик

Жорий йилнинг 24 январь куни кечаси Истанбулнинг Шишли тумани Дуатепе маҳалласида даҳшатли воқеа содир бўлди. Маҳаллий вақт билан соат тахминан 19:40 ларда ҳудудда чиқинди йиғиш ва қоғоз териш билан шуғулланиб юрадиган Окан исмли шахс Куюлубоғ кўчаси, 25-уй олдидаги ахлат контейнерини ковлар экан, чойшаб ва пакетларга ўралган жасадни пайқаб қолган. У ҳолат ҳақида полицияга хабар берган.

Оканнинг айтишича, у контейнерни ковлаётган вақтида қора пакетни кўрган, уни йиртганида қон ва инсон жасадига кўзи тушган ҳамда жасад ҳали иссиқ эканини сезган. Шундан сўнг Ферикўй полиция бўлимига бориб ҳолатни маълум қилган. Воқеа жойига келган ходимлар атрофни ўраб олиб, кенг қамровли тергов ишларини олиб борган. Текширув давомида жасад аёл кишига тегишли экани аниқланган. Бироқ унинг боши ва кесилган оёқлари топилмаган.

Яна бир гувоҳнинг сўзларига кўра, жасаднинг қолган бўлаклари чамадонга солиниб,  бир неча кўча наридаги Бозкурт кўчасидаги ахлатхоналардан бирида ташлаб кетилган. Кузатув камералари текширилганда, гумонланувчиларнинг жасадни чамадон ичида олиб келиб ташлаган лаҳзалари акс этган.

Жамоат хавфсизлиги бўлими ходимлари томонидан ўтказилган текширувлар натижасида бармоқ изи орқали аёлнинг шахси аниқланган. У Ўзбекистон фуқароси 37 ёшли  Дурдона Ҳакимова экани маълум бўлган.

Истанбул полицияси Истанбул аэропортида Грузияга қочмоқчи бўлган пайтда икки нафар қотилликда гумонланувчи шахсни қўлга олган.  Полиция маълумотига кўра, қотилликни марҳума билан яқин муносабатда бўлгани айтилган Ўзбекистон фуқароси, қурилиш ишчиси содир этган. Унга яна бир қурилиш ишчиси ёрдам берган.

“Дурдона Ҳакимова билан воқеа куни танишганмиз, орамизда муносабат бошланган. Жанжаллашиб қолдик ва мен уни пичоқ билан ўлдирдим. Кейин дўстим билан бирга жасадни бўлакларга ажратдик. Жасад қисмларини алоҳида пакетлаб, чамадон ичига жойладик. Сўнг тижорат таксиси билан Шишли туманига келдик ва жасад ҳамда унинг қисмларини турли ахлат контейнерларига ташлаб юбордик”, дейди у.

Шунингдек, гумонланувчилар фойдаланган таксини бошқарган шахс ҳам қўлга олинган. Шу тариқа иш бўйича ҳибсга олинганлар сони 3 нафарга етган.

Воқеа тафсилотлари ва тергов жараёнларини ўрганиш мақсадида, Туркияда бўлиб турган Qalampir.uz таҳририяти раҳбари Қамариддин Шайхов Ўзбекистоннинг Истанбул шаҳридаги Бош консули Шерзод Абдуназаров билан боғланди.

Муҳожир аёллар ёлғиз эмас!

Ўзбекистонлик муҳожир аёлнинг ваҳшийларча ўлдирилиши ортидан Туркия кўчаларида аёллар норозилик намойишига чиқди. Хусусан, 26 январь куни намойишлар  Истанбулда маҳаллий вақт билан соат 16:00 да Османбей метро бекати яқинида, Анқарада эса Юксел кўчаси Инсон ҳуқуқлари ҳайкали олдида бошланган. Аёллар жасад топилган Куюлубоғ кўчасига юриш қилиб, эркаклар зўравонлигига қарши “Муҳожир аёллар ёлғиз эмас” дея шиорлар айтган. Аёллар  қўлларида “Эркаклар зўравонлигини тўхтатинг”  “Хавфсиз ва эркин ҳаёт истаймиз”, “Аёллар қотиллиги — сиёсий масала”, “Шишлида бир йилда 3 аёл қотиллиги”, “Муҳожир аёллар ёлғиз эмас” ва “Ўлдирилган аёлларнинг ҳисобини сўраймиз” деган ёзувли плакатларни кўтариб олган. 

“Кеча Истанбулнинг қоқ маркази – Шишлида аёл дўстимизнинг жонсиз танаси чиқинди контейнеридан топилди. Унинг танаси бўлакларга бўлинган эди.
Дурдонанинг ўлимига ҳокимият масъул. Агар аёлларнинг, ҳатто Истанбул марказида ҳам яшаш ҳуқуқи тортиб олинаётган бўлса, бу шу ҳокимиятнинг натижасидир. Жиноятчи кўрсатмасида Дурдона билан воқеа содир бўлган кун танишгани, муносабатлари бўлганини, жанжаллашиб қолиб, кейин ўлдирганини айтмоқда. Буни айтиш қанчалик осон, шундай эмасми? Аммо бир аёл ўлдирилди. Бу кўрсатма бошидан охиригача жазони енгиллаштиришга қаратилган. Дурдона муҳожир эди. Балки ишлаш учун келгандир, орзулари бор эди, янги ҳаёт қурмоқчи эди. Бу орзулар унинг қўлидан тортиб олинди. 2025 йилда 294 аёл ўлдирилди. Уларнинг барчаси бугун орамизда бўлиши мумкин эди”, дея маҳаллий аёллар акция давомида баёнот берган.

Бундан ташқари  “Аёллар қотиллигини тўхтатамиз” платформаси баёнотида, бу воқеа жазосизлик сиёсати, аёллар қотиллигига кўз юмилишининг ва адлия тизими ишламаётганининг оқибатидир. Жиноятчилар жазоланмаслигига шунчалик ишонишадики, шаҳарнинг қоқ марказида, ҳаммага кўриниб турган чиқинди контейнерига ўлдирилган аёлнинг жасадини ташлай олишяпти”, деб ёзилган.

Ваҳший қотилликка, ҳатто 2025 йил 23 мартдан бери қамоқда бўлган  Шишли тумани ҳокими Расул Эмраҳ Шаҳан ҳам Силиври қамоқхонасидан  туриб муносабат билдирган.  У аёллар қотиллиги жазосизлик ва бепарволик сабаб “қирғин”га айланаётганини таъкидлаган.

“Кеча Шишлида 36 ёшли Ўзбекистон фуқароси Дурдона Ҳакимованинг ваҳшийларча ўлдирилгани ҳақидаги хабар бугун Силиврида менга етиб келди. Аёллар қотиллиги жазосизлик, бепарволик ва сукут туфайли тобора кучайиб бораётган қирғинга айланмоқда. Бу муаммони маҳалладан бошлаб ҳуқуқ-тартибот, ижтимоий хизматлар, муниципалитет ва марказий идоралар ҳамкорликда ҳал қилиш керак. Деворга қараб ўйлайман: аёлларни, қиз болаларни, Дурдоналарни, Ширинларни қандай ҳимоя қиламиз? Бу жиноятнинг очилиши ва айбдорларнинг энг оғир жазога тортилиши ортидан бораман. Шишли, Истанбул ва бутун мамлакат кўчалари аёллар учун хавфсиз бўлмагунча, бизга тинч уйқу йўқ”, деган у.

Дурдона Ҳакимова Туркияда шафқатсизларча ўлдирилган илк ўзбекистонлик аёл эмас. Бундан аввал ҳам бир нечта  ожиза дея таърифланувчилар Туркияда таъқибга учраган, яна энг ачинарлиси ўз ватандошлари томонидан ўлдириб кетилганди.

Хусусан, 2025 йил 17 августда ўзбекистонлик аёл ўз эри томонидан ваҳшийларча ўлдирилган. Воқеа Иҳламуркую маҳалласи Айташи кўчасида юз берган. Маълумотларга кўра, эр хотинини рашк қилиб, у билан жанжаллашган. Тортишув вақтида 35 ёшли эр аёлни томоғидан ваҳшийларча кесиб ташлаган. Аёл олган тан-жароҳатлари оқибатида воқеа жойида вафот этган. Ўз жуфтини ўлдиргач, эркак воқеа жойидан қочиб кетган. Истанбул полицияси томонидан олиб борилган излаш ишлари давомида у 18 август куни эрталаб Умраниеда қўлга олинган. Тергов жараёнларида эркак жиноятни содир этганини тан олган.

Яна бир ҳолат, 2025 йилнинг сентябрь ойида Туркиянинг ўзбекистонликлар энг кўп истиқомат қиладиган мегаполисларидан бири Истанбулнинг Фотиҳ туманида содир бўлган. Унда 36 яшар Зулайҳо  бўғзидан пичоқланиб, ваҳшийлик қурбони бўлган эди.

Зулайҳонинг дўстлари у билан бир неча кун давомида боғлана олмагач, уй эгаси ва аёлнинг дугонаси ундан хабар олиш мақсадида хонадонга келган. Аёл Оқсарой маҳалласидаги ижара уйида қонга беланган ҳолда топилган.

Шундан сўнг зудлик билан полицияга хабар берилган. Воқеа жойига тергов гуруҳи ва тез тиббий ёрдам етиб келганда шифокорлар аёл аллақачон вафот этганини аниқлаган. Бош консулхона маълумотларига кўра, аёлнинг асл исми аслида бошқача бўлган. У бир неча йил аввал Туркияда бўлиш қоидаларини бузгани учун депортация қилинган ва унга мамлакатга кириш тақиқлаб қўйилган. Аммо аёл кейинчалик исм-фамилиясини ўзгартирган ҳолда Туркияга борган. Бироқ унинг қотили ҳалигача топилмаган.

Бу қотилликлар Ўзбекистонда ҳам кенг муҳокамаларга сабаб бўляпти. Фикрлар эса турлича. Гарчи қотил ва қурбонлар аниқ бўлса-да, бир томон аниқ оқликда, бошқаси эса қораликда  таърифланмаяпти. Туркияда меҳнат муҳожирлиги мақомини олган аёлларнинг кўпчилиги бир тамғадан қўрқади. Чунки тез-тез турк ОАВларида нопок йўллар билан пул ишлаётган ўзбек аёллари қўлга олингани ҳақида хабарлар чиқади. Бунинг натижасида бошқа ҳалол меҳнат қилаётганларга ҳам шубҳали нигоҳлар ташланади. Ва айнан шунинг учун ўлим ҳолатлари билан боғлиқ вазиятларда катта эҳтимол билан шу фикр илгари сурилади. Асл вазиятни билмасдан, етарли далилларга эга бўлмасдан гапириш ҳамиша осон. Шу сабаб Qalampir.uz жамоаси айниқса, инсон ўлими билан боғлиқ вазиятларда фикр билдиришда эҳтиёт бўлишингизни сўрайди.