Ўзбек футболи бу мундиалдан нима ютди?

2026 йилнинг ёзи Ўзбекистон футболи тарихидаги энг муҳим саҳифалардан бирига айланди. Миллий терма жамоа илк бор FIFA Жаҳон чемпионати финал босқичида иштирок этди. Ўнлаб йиллар давомида ушалиши орзу қилинган мақсад амалга ошди. Миллионлаб мухлислар кўчаларга чиқди, стадионларда Ўзбекистон байроғи ҳилпиради, футболчилар эса дунёнинг энг йирик футбол майдонларида мамлакат шарафини ҳимоя қилди.

Аммо вақт ўтиши билан тарихий воқеалар ҳиссиёт билан эмас, натижа ва хулосалар билан баҳоланади. Бугун Ўзбекистоннинг Жаҳон чемпионатидаги иштирокига назар ташланса, битта савол табиий равишда кун тартибига чиқади: Ўзбекистон бу мундиалдан аслида нима ютди?

Бу саволга жавоб беришга шошилмаслик керак. Чунки тарихий иштирокнинг ўзи ҳали муваффақият дегани эмас. Жаҳон чемпионатига чиқиш – катта ютуқ. Аммо Жаҳон чемпионатида қандай футбол намойиш этилгани, бу турнир мамлакат футболига қандай фойда бергани ва ундан қандай хулосалар чиқарилгани ундан ҳам муҳимроқ масаладир.

Кўпчилик бугун фақат битта фактни тилга олмоқда – Ўзбекистон мундиалда дебют қилди. Бу – ҳақиқат. Лекин орадан бир неча йил ўтганидан кейин ҳеч ким дебютнинг ўзини эсламайди. Футбол тарихида натижа, тараққиёт ва давомийлик эсда қолади.

Агар 2026 йилги Жаҳон чемпионати Ўзбекистон футболи учун янги босқичнинг бошланишига айланса, бу иштирок ўзини оқлаган бўлади. Аксинча, агар бу турнир фақат тарихий суратлар, эмоциялар ва “биз ҳам мундиалда ўйнадик” деган хотира билан якунланса, демак, қўлга киритилган энг катта ютуқ ҳиссиёт бўлиб қолади.

Аслида, бу мақоланинг асосий мақсади ҳам айнан шу саволга жавоб топишдир. Ўзбекистон нимани қўлга киритди? Нималарни бой берди? Ва энг муҳими, бу турнирдан қандай сабоқ чиқарилди?

Бу саволларга жавоб бериш учун фақат ҳисоблар жадвалига қараш етарли эмас. Учта учрашувнинг мазмунини, мураббийлар штаби танлаган йўлни, футболчиларнинг индивидуал имкониятларини, уларнинг трансфер салоҳиятини ҳамда Ўзбекистон футбол ассоциацияси олдида турган стратегик вазифаларни биргаликда таҳлил қилиш керак.

Биринчи қарашда ҳаммаси оддий кўринади: учта ўйин ва учта мағлубият. Аммо бу рақамлар ортида янада жиддийроқ саволлар яширинган.
Масалан, Ўзбекистон чиндан ҳам имкониятидан келиб чиқиб ўйнадими ёки жамоа ўз салоҳиятининг тўлиқ намоён эта олмади? Мураббий Фабио Каннаваро футболчиларнинг кучли томонларини очиб бера олдими ёки аксинча, уларни ўз фалсафасига мослаштиришга уриндими? Жаҳон чемпионатида қатнашиш ўзбекистонлик футболчиларнинг трансфер қийматини оширдими ёки аксинча, айрим футболчилар ўз имкониятларини намойиш қила олмай, Европа скаутларини ишонтира олмадими?

Бир жиҳатни бошиданоқ айтиш керак: бу мақоланинг мақсади тарихий иштирокни қадрсизлантириш эмас. Аксинча, тарихий ютуқ ортида қолиб кетаётган муаммоларни кўрсатишдир. Чунки футбол ривожланиши учун баъзан ғалабадан кўра мағлубиятни тўғри таҳлил қилиш муҳимроқ бўлади. Ва, эҳтимол, Ўзбекистон учун 2026 йилги Жаҳон чемпионатининг энг катта ютуғи ҳам айнан шу бўлиши мумкин.

Учта мағлубият ортидаги ҳақиқат: Ўзбекистон қандай ютқазди?

Жаҳон чемпионатидаги иштирокни фақат натижалар орқали баҳолаш доим ҳам тўғри эмас. Баъзан 1:0 ҳисобидаги мағлубият ҳам умид уйғотади, айрим ҳолларда эса ғалаба қозонган жамоанинг ўйинида ҳам жиддий муаммолар кўринади. Шу боис Ўзбекистоннинг мундиалдаги учта учрашувини таҳлил қилишда ҳисобдан кўра ўйин мазмунига эътибор қаратиш муҳим. Чунки айнан ўйин сифати терма жамоа қайси даражада эканини кўрсатади. Мундиал давомида Ўзбекистон уч хил қитъа ва уч хил рақибга қарши майдонга тушди. Уларнинг ўйин услуби, босими ва индивидуал маҳорати турлича эди. Аммо учала учрашувни бирлаштириб турган битта умумий жиҳат бор эди – Ўзбекистон деярли ҳар бир ўйинда ўз хатолари эвазига мағлубиятга учради. Бу жуда оғир, аммо ҳақиқатга яқин хулоса.
 
Биринчи ўйин: ортиқча эҳтиёткорлик қимматга тушди. Ҳар қандай дебютант илк ўйинда ҳаяжон билан майдонга тушиши табиий. Лекин Жаҳон чемпионатига мураббий айнан шундай вазиятларни бошқариш учун олиб келинади. Фабио Каннаваро илк учрашув учун танлаган модель максимал даражада хавфсиз футболга асосланди. Ҳимоя чизиғи жуда паст жойлашди, марказий ярим ҳимоячилар асосан ҳимояга ёрдам бериш билан банд бўлди, ҳужумчилар эса кўпинча ўз жарима майдонигача қайтишга мажбур бўлди.
Натижада Ўзбекистон тўпни олиб қўйгандан кейин ҳужумни бошлаш учун 60–70 метр масофани босиб ўтишга тўғри келди. Замонавий футболда эса бундай масофани тезкор қарши ҳужум билан босиб ўтиш учун нафақат жисмоний тайёргарлик, балки аниқ ишлаб чиқилган автоматизмлар ҳам керак. Терма жамоада эса бундай автоматизмлар деярли кўринмади.

Энг ачинарлиси, Ўзбекистон ўзининг энг кучли қуролларидан фойдаланмади. Тезкор қанотлар ва техник ярим ҳимоячилар рақиб дарвозаси олдида эмас, ўз майдонида кўпроқ вақт ўтказди. Бу эса уларнинг индивидуал сифатларини чеклаб қўйди.

Мураббий хавфни камайтиришни мақсад қилган бўлиши мумкин. Аммо хавфни камайтириш эвазига жамоа ҳужумдаги барча имкониятларидан ҳам воз кечди.
Иккинчи ўйиндаги тезкор голлар рақибнинг салоҳияти дастлабки дақиқалардан терма жамоага босим юклади ва бу босимдан чиқиб кетиш қийин бўлди. Португалиянинг тезкор голи Ўзбекистоннинг ўйин режасини бутунлай ўзгартириб юборди. Темур Кападзе даврида ҳам, Каннаваро бошчилигида ҳам жамоа асосан тартибли ҳимоя ва қарши ҳужумларга таянган ҳолда ҳаракат қилиб келган. Эрта ўтказиб юборилган гол эса бу режани бузди. 17-дақиқада Нуно Мендеш ҳисобни 2:0 кўринишига келтиргач, ўзбекистонлик футболчилар рақибни юқорироқ кутиб олишга мажбур бўлди. Бу эса Португалиянинг тезкор қанот ҳужумчилари учун бўш ҳудудлар пайдо қилди.

Учинчи ўйин: нега ҳақиқий футбол охирги учрашувда пайдо бўлди? Мундиалдаги энг катта парадокслардан бири шундаки, Ўзбекистон энг мазмунли футболини айнан мусобақадаги сўнгги учрашувда намойиш этди. Босим камайгач, футболчилар эркинроқ ҳаракат қила бошлади. Қисқа паслар сони ортди. Олдинга ҳаракат қилиш истаги пайдо бўлди. Ярим ҳимоячилар таваккал қилишдан қўрқмади. Қанот ҳимоячилари ҳужумга фаол қўшилди. Лекин фақат битта бўлимда. Терама жамоа биринчи бўлимни қанчалар яхши ўтказган бўлса, иккинчи бўлимда шу даражада ёмон ўтказди.

Битта ўйинда икки хил футбол намойиш қилиш мумкинми? Ҳа бу асосан ҳисобни учлаш билан бўғлиқ бўлган интилиш ва жисмоний ҳолат билан боглиқ.
 
Мураббий футболчиларга мослашдими ёки футболчилар мураббийга? Бу мундиал давомида энг кўп муҳокама қилиниши керак бўлган масалалардан бири – мураббий. Фабио Каннаваро фаолияти давомида кўпроқ ҳимоявий футбол тарафдори сифатида танилган. Ўзбекистон терма жамоаси ҳам сўнгги йилларда айнан ишончли ҳимоявий футбол ва тезкор қарши ҳужумлар, техник ярим ҳимоячилар ва фаол қанотлар эвазига Осиё саралашида муваффақият қозонган эди.
 
Савол туғилади: Катанец даврида яхшигина пишиб етилган ҳимоя нега мундиалга келиб парокандага айланди? Тўғри, Ўзбекистон саралашда ва Осиё кубогида катта жамоаларга қарши ўйнамади. Лекин ҳимоядаги арзимаган хатолар ва дарвозабоннинг ишончсиз ўйини айнан мундиал босимида юзага келдими ёки бу Каннаваронинг ўйин услубидан келиб чиқилган хатоларми?
 
Алмаштиришлар ҳам саволларни кўпайтирди. Фабио Каннаваронинг ўйин давомида қабул қилган айрим қарорлари ҳам баҳс-мунозараларга сабаб бўлди. Баъзи учрашувларда ўйиндан тушиб қолган футболчилар майдонда узоқ вақт қолдирилди. Аксинча, ўйинни ўзгартира оладиган захира футболчилари кеч майдонга туширилди ёки умуман имконият олмади. Ҳар учала учрашувда ҳам Каннаваро захирадан қўшилган футболчилар билан ўйинга таъсир кўрсата олмади ёки бу таъсир деярли кўринмади.
 
Учта ўйиндан қандай хулоса чиқади? Учала учрашувни биргаликда таҳлил қилганда битта умумий хулоса пайдо бўлади. Ўзбекистон Жаҳон чемпионатига тасодифан чиққан жамоа эмас. Аммо Ўзбекистон ҳали Жаҳон чемпионатида ўз футболини рақибларга қабул қилдира оладиган жамоага ҳам айлангани йўқ. Терма жамоа кўпроқ рақибга мослашишга уринди.
 
Дунёнинг кучли жамоалари эса аксинча, рақибни ўз футболига мослашишга мажбур қилади. Мана шу фарқ Ўзбекистон билан футбол элитаси ўртасидаги энг катта тафовут бўлиб қолди. Шу сабабли учта мағлубиятнинг асосий сабаби индивидуал маҳоратдаги тафовут эмас, балки ўйин модели, мураббийнинг қарорлари ва мавжуд ресурслардан максимал даражада фойдалана олмасликда бўлди.

4 миллион евролик лойиҳа нимани берди? Ўзбекистон мундиалдан фойда кўрдими ёки фақат тарих яратдими?

Ўзбекистон учун Жаҳон чемпионати якунланди. Ҳиссиётлар аста-секин босилмоқда. Энди эса энг муҳим босқич – хулоса чиқариш вақти келди. Мундиалнинг ҳар бир иштирокчиси турнирни ўз мақсади билан бошлайди. Кимдир кубок учун курашади, кимдир чорак финални орзу қилади, яна кимдир футболчиларини жаҳон бозорига олиб чиқишни мақсад қилади. Ўзбекистон қайси тоифага киради?
 
Биринчи қарашда жавоб оддий: дебютант учун мундиалнинг ўзи катта ютуқ. Бу фикрни инкор этиб бўлмайди. Лекин бугунги замонавий футболда Жаҳон чемпионатига фақат иштирок этиш учун борилмайди. Мундиал – бу футболчиларни дунёга кўрсатадиган энг катта трансфер майдони, мураббийлар малакасини синовдан ўтказадиган платформа ва миллий футбол тизимининг қанчалик ривожланганини кўрсатадиган кўзгу.

Шу нуқтаи назардан қараганда, Ўзбекистоннинг мундиалдаги мақсади юқоридаги бирорта тоифага кирмайди. Сабаби Фабио Каннаваро терма жамоа мураббийлигига тайинлангандан бери фақат битта нарсани айтиб келди – “бу мундиал биз учун тажриба бўлади”. Агар мақсад фақат тажриба орттириш бўлса, Диде Дешам, Роналд Куман ва Лионел Скалонидан кўп маош олувчи мураббийни олиб келиб у билан тажриба орттиришга бориш қай даражада тўғри қарор бўлади? У “мақсадимиз тажриба орттириш”, деб шу даражада бот-бот такрорландики, ҳаттоки айрим футболчиларнинг Жаҳон чемпионатидан мақсади йўқдек кўринди, жумладан, Абдуқодир Ҳусановда ҳам. Достонбек Ҳамдамов ва айрим футболчиларининг мундиалдаги асосий мақсади Криштиану Роналду билан ўйнаш бўлгани эса уларга ишонган бутун бошли миллат учун ҳурматсизлик.

Агар мақсад ростдан ҳам тажриба орттириш бўлса, мураббийга ассоциация томонидан вазифа юклатилмаган ва эркинлик берилган бўлса, бу нега Кападзе билан эмас? Маҳаллий мутахассисни жаҳон саҳнасидаги иштироки мамлакат футболининг келажаги учун ҳам фойдали бўлмасмиди? 3 та ўйинда 11 та гол ўтказишни Термур Кападзе ҳам эплай оларди.

Каннаваронинг Жаҳон чемпионатидаги иши мутахассислар томонидан қандай баҳоланди?

Олий Мажлис Қонунчилик палатасидаги “Миллий тикланиш” демократик партияси раиси Алишер Қодиров ўзининг Telegram-каналида ёзди.
Қодиров Ўзбекистон миллий терма жамоасининг АҚШнинг Хьюстон шаҳридаги NRG стадионида бўлиб ўтган Португалияга қарши учрашувдаги 5:0 ҳисобидаги мағлубиятидан сўнг мутасадди ва футболчиларни аёвсиз танқид қилди.

“Бу мундиалда жамоани ярми бўла оладиган дарвозабон йўқ эди, жиддий бўшлиқ. Фикрим ўзгарди, Осиё кубогини олиш деган хомхаёл билан бирга таркибдаги “хизмат кўрсатган”лардан кечиб, шу мусобақадаёқ кейинги саралаш даврида ишлайдиган таркибни ўйнатиш керак”, деб ёзади Қодиров.

Шунингдек, депутат терма жамоа бош мураббийи Фабио Каннаваро Беҳруз Каримов, Аббос Файзуллаев ва Абдуқодир Ҳусанов каби футболчилар атрофида терма жамоани шакллантиришини ва келаси икки Жаҳон чемпионати саралаш босқичида ҳам рақобатлаша оладиган 30 нафарлик таркибни аниқлаштириши кераклигини айтиб ўтди. 

“Ҳа, сиз бунга лойиқ эмассиз деб айта олмайман, чунки майдон текис, тўп юмалоқ ва уларда сиздан ортиқ ўйинчи, оёқ ёки қўл йўқ эди, лекин сиз бунга рози эмассиз, умид берадиган қисми шу ерда… Босим бўладими, момақалдироқ чақадими – Конго билан ўйинни биз эмас, ўзингиз учун ўйнанг, футболчи нонини еяпсиз, ғурурингизга ўт тушди, адашмасам…”, деб ёзади Қодиров.

Фикрлари сўнгида Қодиров Ўзбекистон миллий терма жамоасини Осиёнинг энг кучли терма жамоалари қаторига кирмаслигини ҳам айтиб ўтди. 

“Осиёнинг зўр ва энг зўрлари аниқ ва биз у ерда эмасмиз”, дейди Қодиров.

Шунингдек, Ўзбекистон миллий терма жамоасининг собиқ ҳужумчиси Сервер Жепаров Фабио Каннаваро бошқараётган жамоага 2026 йилги Жаҳон чемпионатида тажриба етишмаганини ва тўп билан муомала қилишда қатор камчиликлар кузатилганини айтди. 

“Бизда бундай йирик мусобақада иштирок этиш тажрибаси етишмади. Бу Ўзбекистон терма жамоасининг илк Жаҳон чемпионати эди. Колумбия ва Португалия биздан анча кучли жамоалар. Конго Демократик Республикаси эса имкониятларимиз доирасидаги рақиб эди. Аммо биз футболни тўп билан ўйнашни ўрганишимиз керак. Футбол бу тўп билан ўйналадиган ўйин. Биз эса ҳар учала учрашувда ҳам деярли тўпсиз ҳаракат қилдик. Бу Ўзбекистон учун қабул қилиб бўлмайдиган ҳолат. Биз тўпга эгалик қилишимиз, ўйинни назорат қилишимиз керак. Бу бизнинг кучли жиҳатимиз”, дейди Жепаров.

Ўзбекистон миллий терма жамоаси собиқ футболчиси терма жамоанинг ҳужумни бошлашдаги камчиликларини танқид қилди. 

“Ҳимояланиш ҳам ўйиннинг муҳим қисми. Бироқ тўпни қайтариб олгандан кейин қандай ҳаракат қилишимиз ҳам тактик жиҳатдан катта аҳамиятга эга. Шунчаки тўпни олдинга тепиб юбориш ечим эмас. Учта ўйин статистикаси шуни кўрсатдики, жамоамиз асосан тўпсиз ўйнади. Ҳозирда кучли Европа чемпионатларида ҳаракат қилаётган атиги уч нафар футболчимиз бор ва бу жуда кам. Биз тўғри таҳлил қилишимиз ҳамда келгуси Жаҳон чемпионатларига рақобатбардош тарзда тайёргарлик кўриш учун тўрт йилдан саккиз йилгача мўлжалланган стратегия ишлаб чиқишимиз керак. Энг муҳими, кейинги мундиалларда фақат иштирок этиш эмас, балки муносиб ўйин кўрсатишга эришишимиз лозим”, дейди Жепаров.

Бундан ташқари, Россиянинг “Балтика” клуби бош мураббийи Андрей Талалаев Ўзбекистон миллий терма жамоасининг 2026 йилги Жаҳон чемпионатидаги иштирокини кутилганидан кўра ёмонроқ эканини айтди. 

“Ўзбекистон миллий терма жамоаси ҳақида ҳам бир неча оғиз. Албатта, бу жамоа мундиалда дебют қилди ва ундан катта натижа кутилмаганди. Аммо учта ўйинда 2:11 ҳисобидаги тўплар нисбати ва бирорта ҳам очко тўплай олмагани, айниқса таркибида Абдуқодир Ҳусанов, Аббосбек Файзуллаев ҳамда Элдор Шомуродов каби футболчилар бўлган жамоа учун жуда ёмон натижа. Бу мураббий алмашинувининг оқибати. Улар эскисидан воз кечишди, аммо янгисини қура олишмади”, дейди Талалаев.

Шунингдек, “Матч ТВ” бошловчиси ва шарҳловчиси Дмитрий Губерниев ҳам Ўзбекистон миллий терма жамоасининг дебют Жаҳон чемпионатидаги иштирокини баҳолади.

“Биринчи қадам доим ҳам муваффақиятли чиқмайди. Жамоада етакчи бўлиши керак бўлган футболчилар бор эди, аммо улар, афсуски, яккакурашларда рақибларига ютқазишди. Индивидуал маҳорат жиҳатидан ҳам жамоа рақибларидан анча паст эди. Балки майдонда фидойилик етишмагандир, аммо бор ҳолат шу. Шунга қарамай, жамоага ўйини учун раҳмат айтиш керак”, дейди Губерниев “Матч ТВ” дастуридан бирида.

Агар трансфер бўлмаса, мундиалнинг спорт қиймати камаяди

Бугунги футбол иқтисодиётида Жаҳон чемпионатининг энг катта ютуқларидан бири – футболчиларнинг трансфер қийматини оширишдир. Ҳар бир мундиалдан кейин ўнлаб футболчилар кучли чемпионатларга йўл олади. Скаутлар айнан шу мусобақада янги номларни излайди. Клублар миллионлаб евролик қарорларни айнан Жаҳон чемпионатидаги ўйинларга қараб қабул қилади.
 
Ўзбекистон учун ҳам асосий мезонлардан бири шу бўлиши керак эди. Агар мундиалдан кейин камида икки ёки уч нафар футболчи Англия, Испания, Германия, Италия ёки Франциянинг Топ-5 лигаларига йўл олса, бу турнир спорт нуқтаи назаридан ўзини оқлаган бўлади. Чунки бундай трансферлар нафақат ўша футболчиларнинг, балки бутун Ўзбекистон футболининг нуфузини оширади. Европа клублари ўзбек футбол бозорига жиддийроқ қарай бошлайди, кейинги авлод футболчилари учун ҳам эшиклар очилади.
 
Агар бундай трансферлар амалга ошмаса, унда оғриқли савол туғилади: мундиаль ўзбекистонлик футболчиларга нима берди?

• Тарихий суратларми?
• Мухлисларнинг қувончими?
• Ёки шунчаки “биз ҳам Жаҳон чемпионатида ўйнадик” деган хотирами?

Профессионал футбол бундай ҳиссиётлар билан яшамайди. Профессионал футбол натижа ва ривожланишни талаб қилади.

Мундиал айрим футболчилар учун ўзини кўрсатиш имконияти бўлди. Энг аввало, ҳимоячилар босим остида ўйнаш тажрибасига эга бўлди. Кучли ҳужумчиларга қарши ҳаракат қилиш улар учун катта мактаб вазифасини ўтади. Бироқ ҳужум чизиғидаги футболчилар ҳақида бундай дейиш қийин. Улар на статистикаси, на ўйини билан Европа скаутларини ҳайратга сола олди.
4 миллион евролик савол

Фабио Каннаваронинг маоши мундиал давомида энг кўп муҳокама қилинган мавзулардан бири бўлди. Халқаро ОАВда унинг йиллик маоши 4 миллион еврога яқин экани ҳақида хабарлар тарқалди. Ўзбекистон футбол ассоциацияси бу рақамни расман тасдиқламаган бўлса-да, айнан шу сумма кенг муҳокама қилинди. Аммо бу ерда асосий масала пулнинг ўзи эмас. Асосий савол – бу лойиҳа Ўзбекистон футболига нима берди?
 
Агар мураббий узоқ муддатли тизим яратса, ёш футболчиларни ривожлантирса ва футбол фалсафасини ўзгартирса, катта маош ўзини оқлаши мумкин. Лекин агар лойиҳа фақат бир мундиал билан якунланса ва шартнома тугагач мураббий мамлакатни тарк этса, унда бу харажат қандай баҳоланади?
 
Фабио Каннаваро эртага бошқа терма жамоа ёки клубни бошқариши мумкин. Унинг таржимаи ҳолида эса “Жаҳон чемпионатида ишлаган мураббий” деган яна бир муҳим банд пайдо бўлади. Аммо бунда Ўзбекистон футболига фойда йўқ. Фақат Каннаваронинг резюмесига плюс, холос. Мана шу саволга бугуннинг ўзида аниқ жавоб йўқ.

ЎФА жавоб бериши керак бўлган саволлар

Мундиаль якунлангач, танқид фақат мураббийга қаратилиши тўғри бўлмайди. Асосий саволларни Ўзбекистон футбол ассоциациясига бериш вақти ҳам келди. Нега мураббийлар штабида ўзбекистонлик мутахассислар йўқ эди? Нега бу лойиҳа маҳаллий мураббийлар учун тажриба мактабига айлантирилмади?
 
Ахир Жаҳон чемпионати нафақат футболчилар, балки мураббийлар учун ҳам энг катта тажриба мактаби ҳисобланади. Равшан Ҳайдаров, Миржалол Қосимов, Темур Кападзе ёки Ислом Исмоилов каби эртага миллий терма жамоани бошқариши мумкин бўлган номларга Каннаваронинг ёрдамчиси сифатида мундилда ишлаш имкони берилмади? 

Мундиаль нимани берди?

Шундай қилиб, Ўзбекистон 2026 йилги Жаҳон чемпионатидан учта муҳим ютуқ олди.

• Биринчиси – тарих.
• Иккинчиси – тажриба.
• Учинчиси – дунё футболи билан ўз даражасини таққослаш имконияти.

 Аммо йўқотилган жиҳатлар ҳам кам эмас. Футболчиларнинг аксарияти ўз трансфер қийматини сезиларли ошира олмади, мураббийлар штабининг қарорлари кўплаб саволларни очиқ қолдирди. Энг муҳими, Ўзбекистон ҳали Жаҳон чемпионатига чиқиш билан Жаҳон чемпионатида рақобатбардош бўлиш ўртасида катта масофа борлигини ҳис қилди. 

2026 йил Ўзбекистон футболи тарихида унутилмайди. Аммо бу мундиалнинг ҳақиқий баҳоси бугун эмас, икки-уч йилдан кейин маълум бўлади.

Агар шу давр ичида икки-уч нафар футболчи Топ-5 лигаларда ўйнашни бошласа, маҳаллий мураббийлар халқаро тажрибани амалда қўлласа, ёшлар тизимида ислоҳотлар давом этса ва миллий терма жамоа кейинги йирик турнирларда бундан кучлироқ кўринса, 2026 йилги мундиаль Ўзбекистон футболи учун бурилиш нуқтаси сифатида тарихда қолади. Агар бунинг акси юз берса, тарихий иштирок фақат чиройли хотирага айланади. Чунки футбол тарихида энг қиммат совға – мундиалга чиқиш эмас. Энг қиммат совға — ўша мундиални бурилиш нуқтасига айлантириш. Бугун Ўзбекистон футболи айнан мана шу танлов олдида турибди.