“Ўзавтосаноат” раҳбари Улуғбек Рўзиқулов гимнастика федерацияси раиси бўлди

Улуғбек Рўзиқулов Ўзбекистон гимнастика федерациясининг раиси этиб сайланди. Бу ҳақда Ўзбекистон Миллий Олимпия қўмитаси Матбуот хизмати хабар берди.

Келтирилишича, кеча, 18 июнь куни Ўзбекистон Миллий Олимпия қўмитасида Ўзбекистон гимнастика федерациясининг навбатдан ташқари ҳисобот-сайлов конференцияси бўлиб ўтган. Унда федерациянинг аввалги раҳбари бошқа ишга ўтгани муносабати билан ташкилотга янги раис сайлаш конференция кун тартибидаги асосий масала экани таъкидланган. МОҚ Бош котиби Ойбек Қосимов ушбу лавозимга федерация бош ҳомийси “Ўзавтосаноат” АК бошқарув раиси Улуғбек Убайдуллаевич Рўзиқулов номзодини илгари сурган. Конференция қатнашчилари бир овоздан ушбу номзодни қўллаб-қувватлаган ва Улуғбек Рўзиқулов Ўзбекистон гимнастика федерациясининг раиси этиб сайланган.

Ўз навбатида Рўзиқулов Президент Шавкат Мирзиёевнинг “Гимнастика спорт турларини янада ривожлантириш чора-тадбирлари тўғрисида”ги Қарори ижросини таъминлаш, мавжуд муаммо ва масалаларни ҳал этиш, гимнастика ривожини янги босқичга олиб чиқиш йўлида бор куч-ғайратини сафарбар қилишини таъкидлаган. Шунингдек, у ҳудудларга эътиборни янада кучайтириш, вилоятлардаги моддий-техник базани кучайтириш, спортчиларни ҳар томонлама рағбатлантириш каби масалаларга ҳам тўхталган. Шу билан бирга Ёшлар сиёсати ва спорт вазирининг ўринбосари Шаҳрулло Маҳмудов тадбирга онлайн тарзда иштирок этиб, унга ўзбекистонлик спортчиларнинг Ханчжоу-2022 Осиё ва Париж-2024 Олимпия ўйинларида муносиб иштирокларини таъминлаш каби масъулиятли вазифаларни бажариш йўлида куч-қувват тилаган.

Маълумот учун, мазкур федерацияни бир пайтлар Ўзбекистон Республикасининг Биринчи Президенти Ислом Каримовнинг кенжа қизи Лола Каримова-Тилляева бошқариб, 2018 йилнинг 6 март куни федерация президенти лавозимини тарк этган.

Эслатиб ўтамиз, бунга қадар федерацияни “Ўзавтосаноат”нинг аввалги раҳбари Шавкат Умурзоқов бошқарган. Март ойида у Тошкент шаҳри ҳокими вазивасини бажарувчи этиб тайинланган. Кейинроқ Улуғбек Рўзуқулов “Ўзавтосаноат” раҳбари сифатида эълон қилинганди.