Urush shamoli turdi: Rossiya va AQSH diplomatlarini Ukrainadan olib ketmoqchi

AQSH va Rossiya Ukraina poytaxti Kiyevdagi barcha diplomatlarini evakuatsiya qilyapti. Rossiya bu ishni avvalroq boshlagan, AQSH esa bugun 16 fevraldan boshlamoqchi. Bu haqda RIA Novosti ma’lum qildi.

“Ukraina fuqarolarining aytishicha, mamlakatdagi rossiyalik diplomatlar va konsullik xodimlari Rossiyaga ketishni boshlagan. Bu, xususan, konsullik va elchixonada qabulga yozilishda yuzaga kelgan qiyinchiliklardan dalolat beradi”, deyiladi xabarda.

Qayd etilishicha, Rossiya Tashqi ishlar vaziri Buyuk Britaniya tashqi siyosati yetakchisi Liz Trass bilan muzokaralar yakunlari bo‘yicha o‘tkazilgan matbuot anjumani chog‘ida bunday ssenariy bo‘lishi mumkinligiga ishora qilgan.

Shuningdek, ”Associated Press” nashriga ko‘ra, AQSH Davlat departamenti Amerikaning Kiyevdagi elchixonasini to‘liq evakuatsiya qilish tashabbusi bilan chiqqan.

“Protokol bugun ishga tushiriladi. U maxfiy hujjatlarni, qattiq disklarni yo‘q qilishni va barcha diplomat hamda boshqa xodimlarning ko‘pchiligini mamlakatni tark etishini o‘z ichiga oladi”, deyiladi boshqa bir xabarda.

Avvalroq, AQSH Prezidenti Jo Bayden amerikaliklarni Rossiya agressiyasi tahdidi tufayli zudlik bilan Ukrainani tark etishga chaqirgan edi. Qo‘shma Shtatlardan tashqari o‘ndan ortiq davlatlar allaqachon o‘z fuqarolaridan Ukrainani tark etishni so‘ragan.

Ommaviy axborot vositalariga ko‘ra, ayni vaqtda Isroil diplomatlarining oilalarini Kiyevdan evakuatsiya qilgan. Norvegiya o‘z fuqarolarini Ukrainani tark etishga chaqirgan. Bundan tashqari, Oslo Ukraina bilan chegaradan 250 kilometr uzoqlikda Rossiya hududiga bormaslikni tavsiya qilmoqda. Latviya Tashqi ishlar vazirligi o‘z fuqarolarini imkon qadar tezroq Ukrainani tark etishga da’vat etgan. Britaniya Kiyevdan elchixona xodimlarini olib ketadi, u konsullik yordamini boshqa ko‘rsata olmasligini bildirgan. Vashington Yevropada xavfsizlik va hamkorlik tashkilotining Ukrainadagi missiyasidan o‘z kuzatuvchilarini chaqirib olmoqchi.