Ўлдирилгани даъво қилинаётган россиялик қўмондон кўриниш берди

Кеча, 26 сентябрь куни Россия давлат телевидениесида Қора денгиз флоти қўмондони адмирал Виктор Соколов мудофаа раҳбарлари йиғилишида масофадан иштирок этган. Украина махсус кучлари эса бир кун олдин уни ўлдирганини маълум қилганди. 

Мудофаа вазирлиги томонидан эълон қилинган видео ва фотосуратларга кўра, Соколов Мудофаа вазири Сергей Шойгу ва бошқа армия бошлиқларининг шахсий учрашувига қатнашгани, гарчи гапирмаса ҳам, флот қўмондонларидан бири сифатида кўрсатилган. Видео қачон суратга олингани эса аниқ эмас.

“Руслар Соколовнинг тириклиги ҳақидаги жавобни эълон қилишга мажбур бўлгани сабаб, Соколовнинг архивдаги тасвирлари кўрсатилган бўлиши мумкин. Бизнинг бўлинмалар ушбу маълумотни ўрганмоқда”, деган  Украина махсус кучлари бунга жавобан. 

Украина Мудофаа вазири Рустам Умаров эса CNN телеканалига берган интервьюсида Соколовнинг ҳалок бўлганини на тасдиқлади, на инкор этди. Унинг ўлими барча учун “хушхабар” бўлишини айтган, холос.

“Соколов бизнинг вақтинчалик босиб олинган ҳудудларимизда. Аслида Соколовнинг жойи бу ерда эмас. Шу боис ҳам унинг ўлгани ўз ҳудудларимизни озод қилаётган пайтимизда, ҳаммамиз учун яхши хабар”, деган Умаров.

Эслатиб ўтамиз, олдинроқ Украина махсус операция кучлари 22 сентябрь куни Россия Қора денгиз флоти штаб-квартирасига берилган зарба оқибатида 34 зобит, шу жумладан қўмондон Виктор Соколов ҳам ҳалок бўлганини маълум қилганди.