Украинадаги уруш учун Меркель жавобгарлиги айтилди 

Германиянинг собиқ канцлери Ангела Меркель Украинада бўлаётган уруш учун айбдор деб ҳисобланмоқда. У канцлерлик даврида Россиянинг Украинага бостириб киришига имкон берадиган бир қатор қарорлар қабул қилгани айтилди. Бу айбловларни Бундестагдаги мудофаа масалалари бўйича қўмита раҳбари Мари-Агнес Штрак-Циммерманн NTV телеканалларига берган интервьюсида маълум қилди.

Қайд этилишича, ўша даврда Меркель Украинанинг НАТОга аъзо бўлишига йўл қўймаган. 2008 йилда НАТОнинг кўплаб давлатлари Украинанинг альянсга муддатидан олдин қабул қилиниши тарафдори бўлган, бироқ Германия ва Франция Россиянинг позицияси туфайли бу қарорга қарши чиққан.

Циммерманнинг айтишича, Германия федерал ҳукуматнинг ўша пайтдаги хатти-ҳаракатларини қайта кўриб чиқиши ҳамда Россия ҳужумидан кейин Украина ёнида туриши ва уни қурол билан қўллаб-қувватлаши керак. 

Шунингдек, сиёсатчи Украинадаги уруш Биринчи ёки Иккинчи жаҳон урушлари каби узоқ давом этишига ишонмаслигини айтган. 

“Уруш, албатта, тўрт ёки беш йил давом этмайди. Путин Украинани кенг ва барқарор қўллаб-қувватлашни кутмаган эди. Путин бизни мутлақо аҳмоқ деб ҳисобларди”, дейди Бундестаг аъзоси.