Украина Хитой армиясини парадда қатнашгани учун танқид қилди

Украина Хитой ҳарбийларини жорий йилнинг 9 май куни Иккинчи жаҳон уруши устидан қозонилган ғалабанинг 80 йиллигига бағишланган Москвадаги парадда қатнашгани учун танқид қилди. Бу ҳақда “Tencent” хабар берди.

9 май куни кўплаб давлатлар қатори Хитой ҳарбий бўлинмалари ҳам Москвадаги Қизил майдонда ўтказилган ҳарбий парадда қатнашди. Ушбу ҳаракат ортидан Украина расмийлари Хитойни “босқинчини қўллаб-қувватлаш”да айблаган.

Украина танқидларига жавобан Хитой Ташқи ишлар вазирлиги баёнот бериб, Киевни тарихни масхара қилиш ва халқаро ҳуқуқ ҳамда адолатга қарши чиқишда айблаган.

“Хитойнинг Россияда Қизил майдондаги байрамда иштирок этиши бу – тарихга, шаҳидларнинг хотирасига ва Иккинчи жаҳон уруши пайтида эришилган ғалаба учун курашга бўлган ҳурмат ифодасидир. Хитой ва Россия фашизмга қарши урушда ёнма-ён туриб курашган ва бир-бирини қўллаб-қувватлаган”, дейди Хитой Ташқи ишлар вазирлиги.

Эслатиб ўтамиз, аввалроқ Россия Президенти Владимир Путин ҳам 9 май куни байрам тадбирларида сўзга чиқиб, Хитой раҳбари Си Цзиньпин билан бирга Иккинчи жаҳон уруши тугаганининг 80 йиллигини Пекинда нишонлашга келишиб олгани маълум қилинганди.