UFC чемпиони Дана Уайтни бахилга чиқарди

Оғир вазн тоифасида UFC чемпиони Франсис Нганну UFC президенти Дана Уайтдан  промоушиндаги жанглар  учун тўловларни оширишни талаб қилган блогер Жейк Полнинг сўзларига жавоб қайтарди. Франсисга кўра, Жейк Полнинг UFC жангчиларининг иш ҳақини ошириш ҳақидаги талаби тўғри.

“Мен унинг барча баёнотларини интернетда кузатиб бораман ва нима бўлаётганини биламан. Биласизми, Полнинг ўзига хос мулоқот усули бор, бу бошқалардан бироз фарқ қилади. Ҳа, у билан мен бошқача гаплашамиз, лекин мен уни айбламайман. Мен Жейк айтган ҳамма нарсага 100% қўшиламан. Жангчининг ойлигини ошириш керак деса, 1000 фоиз розиман. Аскарлар ҳимояланмаган. Жангчилар ёлғиз, уларга ҳеч ким қарамайди. Гоҳида спорт залида айланиб юриб, жангда эндигина ютқазиб, жароҳат олган бир жангчини кўраман. Лекин у ҳамма жароҳатлари тузалиб кетишига умид қилиб, машғулотларда давом этади, чунки даволанишга қурби етмайди, фақат жанг орқали тирикчилик қилишини билади. Бундай ҳолатларга қараб, бу нормал ҳолат деб ўйлаш қийин. Йўқ, бу нормал эмас, жангчилар доимо соғлиғини хавф остига қўйишади. Ҳеч бўлмаганда уларга яхши тиббий суғурта беринг”, деган Нганну. 

Нганну билдирган фикрларда қайсидир маънода жон бор. UFC'даги жангчиларнинг катта қисми арзимаган чойчақа учун октагонга чиқади. Масалан, жангдан кейинги гонарарлар оддий одам учун каттадек туюлиши мумкин, бироқ жангчининг ҳаётини хавф остига қўйиши учун анча камлик қилади. Мисол учун, Франсис Нганнунинг жангдан олдинги кафолатланган гонарари 600 – 700 минг доллар атрофида бўлади. Эслаб қолинг, бу нарх UFC'нинг энг томошабоп жангчиларидан бирига тўланадиган пулдир. Томошабинлар эътиборига тушмаган спортичиларга бундан икки уч баробар кам ҳақ берилади. 

Бундан олдин, Франсис боксга ўтиш нияти борлиги ҳақида гапирганди. Бунга сабаб сифатида унга тўланаётган ҳақнинг катта эмаслигини таъкидлаган. Мана энди тушунгандирсиз, камерунлик чемпион Франсис Нганну нима учун ММА'ни боксга алмаштирмоқчи экан, бокс ростан ҳам UFC'га қараганда анча саҳий.

Маъруф Абдумаликов