UFC 280. Алжамейн Стерлинг Ти Жей Диллашоуни нокаут эвазига мағлуб этди (видео)

Бугун, 23 октябрь куни Бирлашган Араб Амирликлараининг Абу-Даби шаҳрида UFC 280 турнири доирасида америкалик Алжамейн Стерлинг ўзининг чемпионлик камарини ҳамюрти Ти Жей Диллашоудан ҳимоя қилиш учун октагонга кўтарилди.

Биринчи раунд кутилганидек Стерлингнинг даҳшатли устунлигида ўтди. Алжамейн Диллашоуни партерда истаган кўйига солди. Ти Жей биринчи раундда мутлоқ имкониятни бой берди. Қўшимчасига жиддий жароҳат ҳам орттириб олди.

Иккинчи раундда ҳам Диллашоу вазиятни ўнглашнинг уддасидан чиқа олмади ва кетма кет зарбаларни ўтказиб юборди. Натижада жанг рефереси тўқнашувни муддатидан аввал тўхтатди. Шу тариқа Стерлинг чемпионлик камарини ўзида сақлаб қолди.

Маълумот учун, Алжамейн Стерлинг ММА'даги профессионал фаолияти давомида 24 та жанг ўтказиб, 21 та ғалаба ва 3 та мағлубият қайд этган. Ти Жей Диллашоу эса 22 та жангидан 18 тасида ғалаба қозонган. Ти Жейнинг ҳисобида 4 та мағлубият ҳам бор.