Туркия мухолифати етакчиси Британия устидан ёзғирди

Туркиянинг асосий мухолифати саналмиш Жумҳурият Халқ партияси (ЖХП) раиси Ўзғур Ўзел мамлакатда давом этаётган намойишларга Буюк Британия реакция бермаётганидан ёзғирди. Бу ҳақда у BBC'га берган интервьюсида сўз очган.

Интервью давомида ЖХП раиси Ўзғур Ўзел Экрем Имомўғлининг ҳибсга олинишига нисбатан сукут сақлаган Британия Бош вазири Кир Стармерга мурожаат йўллаган.

“Биз ўзимизни ташландиқ ҳис қиляпмиз”, деган у.

Қолаверса, у Буюк Британия бу ҳақда ҳеч нарса демаётганини ҳам айтиб ўтган.

“Сабаб нима, сабаб нима? Бутун Европа реакция билдираётган бир пайтда биз Британия Лейбористлар партиясидан Стармер нима учун бу ҳақда ҳеч нарса демаганини ҳақиқатдан ҳам тушунмаяпмиз. Биз ўзимизни ташлаб кетилгандек ҳис қиламиз. Истанбул мэрини олиб, қамоққа ташлашади, Британия эса бу ҳақда ҳеч нарса демайди”, деган у ўз интервьюсида.

Маълум қилинишича, Ўзғур Ўзел билан бирга Экрем Имомўғлининг рафиқаси Дилек Имомўғли ҳам “The Economist” нашрига интервью бериб, Туркия ҳукумати устидан шикоят қилган.

“Турмуш ўртоғим Экрем Имомўғли 19 март куни эрта тонгда ҳибсга олинганида, бутун Туркия бўйлаб миллионлаб одамлар худди мен каби шуларни ҳис қилди: қайғу, адолатсизлик ҳисси ва ғазаб кучайиб кетди. Сўнгги йигирма йил ичида, бу ҳукуматнинг ҳокимияти даврида кўп одамлар мамлакат тобора авторитар режимга қараб кетаётганини кўришлари керак эди”, деган Экремнинг рафиқаси.

Экрем Имомўғлининг ҳибсга олиниши

19 март куни тонгда Истанбул ҳокими ва Туркия Президенти Ражаб Тойиб Эрдўғаннинг асосий сиёсий рақиби Экрем Имомўғли ҳамда унинг 106 тарафдори ҳибсга олинганди. Имомўғли ва 99 гумонланувчига нисбатан жиноий ташкилот етакчиси бўлиш, жиноий ташкилотга аъзолик, товламачилик, порахўрлик, малакали фирибгарлик, шахсий маълумотларни қонунга хилоф равишда қўлга киритиш ва тендер савдоларини сохталаштиришда, Имомўғли ва яна 6 киши эса қуролли террор ташкилотига ёрдам бериш билан гумонланганди.

23 март куни суд Экрем Имомўғлини коррупция тергови доирасида ҳибсга олишга қарор қилди. Бош прокуратура Имомўғли “қуролли террор ташкилотига ёрдам берганлиги бўйича кучли гумон” борлигини, аммо уни молиявий жиноятлар учун ҳибсга олиш қарори аллақачон чиқарилгани сабабли, унинг яна ҳибсга олиниши “ҳозирги босқичда зарур эмас”лигини билдирди.

Ўша куни Экрем Имомўғли президентликка номзод қилиб кўрсатилиши учун 14,85 миллиондан ортиқ киши овоз берди. 

Мазкур воқеалар фонида Туркиянинг йирик шаҳарларида намойишлар авж олди. Намойишларда 1 мингдан ортиқ одам ҳисга олинди. Улар орасида Президент Эрдўған ва унинг марҳум онасини ҳақорат қилганлар ҳам бор. Эрдўғаннинг ўзи намойишларда қатнашганларни бундай ҳаракатларининг оқибатларидан огоҳлантирди.