Тўқаев урушни тинчитиш учун Путинга майдон таклиф қилгани айтилди

Қозоғистон бир неча бор Россияга ўзини Украина можаросини тинч йўл билан ҳал қилиш бўйича музокаралар майдони сифатида таклиф қилган. Бу ҳақда Россия Ташқи ишлар вазири ўринбосари Михаил Галузин ТАСС агентлигига берган интервьюсида маълум қилди.

Унинг қайд этишича, Москва Остонанинг мавжуд вазиятни тезроқ ҳал қилиш йўлларини излаш бўйича саъй-ҳаракатларини қадрлайди.

“Қозоғистон бизнинг энг яқин ҳамкоримиз ва иттифоқчимиз бўлиб, биз кўплаб стратегик масалалар бўйича ишончли мулоқот олиб борамиз. Биз республика раҳбариятининг Украина атрофидаги вазиятга эътибори учун миннатдормиз, унинг можарони тезроқ тинч йўл билан ҳал қилиш йўлларини излаш борасидаги саъй-ҳаракатларини қадрлаймиз. Бундан ташқари, Остона музокаралар учун ўз майдонини бир неча бор таклиф қилган”, дейди у. 

Вазир ўринбосари сўзида давом этаркан, Ғарб санкциялари Москва ва Остона ҳамкорлигига ҳеч қандай таъсир кўрсатмагани, мамлакатлар чекловларга амалий ҳамкорлик билан жавоб бераётганини урғулади. 

“Бизга санкциялар билан босим ўтказишмоқда, биз эса бунга жавобан Қозоғистонда Россия лойиҳаси асосидаги биринчи атом электр станциясини ҳамкорликда барпо этяпмиз. Чунки Россия ядро энергетикаси соҳасида тан олинган ва сўзсиз етакчидир”, дейди Галузин.

У босимларга қарамай, икки мамлакат космосни биргаликда ўзлаштириш ва космик техникаларни яратиш лойиҳасини йўлга қўяётганини эслатган. Шунингдек, Россия ва унинг шимолий портларини жанубий денгиз портлари билан боғлайдиган “Шимол – Жануб” халқаро транспорт йўлагининг шарқий тармоғини ҳамда глобал аҳамиятга эга истиқболли денгиз йўли бўлган Шимолий денгиз йўлини биргаликда ривожлантираётганларини билдирган. 

“Шундай тариқа, ҳамкорлигимизнинг кундалик амалиёти Ғарб санкциялари ҳеч қандай самара бермаётганини кўрсатмоқда. Энг муҳими, бу санкциялар Россия сиёсатини заррача ўзгартира олмайди, чунки сиёсатимиз масъулиятли ёндашувга, ўз миллий манфаатларимизни ва уларга эришиш воситаларини англашга асосланган”, дейди у. 

Маълумот учун, Ғарб мамлакатлари (АҚШ, Европа Иттифоқи, Буюк Британия) Украинадаги уруш ортидан Қозоғистоннинг ўзига ёки унинг иқтисодиётига тўғридан-тўғри, кенг кўламли санкциялар киритгани йўқ. Бироқ, Россияга қарши киритилган чекловларни айланиб ўтиш ҳолатларига қарши кураш доирасида иккиламчи санкциялар механизмлари қўлланилмоқда.