Трампга суиқасдда Эроннинг қўли борми?

АҚШ Президенти Дональд Трамп Оқ уй мухбирлари ассоциациясининг кечки тадбирида юз берган отишма ҳодисаси Эрон билан боғлиқ бўлиши эҳтимолини шубҳа остига олди. Бу ҳақда Трамп Вашингтондаги отишма ҳодисасидан сўнг Оқ уйдаги брифинг чоғида айтиб ўтди.

У Оқ уйда ўтказилган матбуот анжуманида “бу воқеа билан Эрон инқирози ўртасида боғлиқлик йўқ деб ўйлайман” дея таъкидлаган. Шу билан бирга, Президент бу ҳодиса унинг сиёсий позициясига таъсир қилмаслигини билдириб, “бу мени тўхтатмайди ва Эронга нисбатан ғалабага эришиш йўлимга халал бермайди” деган.

Трампнинг фикрича, ҳужумчи катта эҳтимол билан ёлғиз ҳаракат қилган.

АҚШ ОАВлари эса терговга яқин манбаларга таяниб, гумонланувчи 31 ёшли Коул Томас Аллен эканини ёзмоқда. У Калифорния штатида яшаган ва ҳозирда қўлга олиниб, сўроқ қилинмоқда. Унга расмий айбловлар эълон қилиниши кутилмоқда.

Эслатиб ўтамиз, қуролли ҳодиса Вашингтондаги меҳмонхонада Оқ уй мухбирлари учун ташкил этилган тадбир вақтида юз берган. Тадбирда Трамп, унинг турмуш ўртоғи ва АҚШ маъмуриятининг бошқа аъзолари ҳам иштирок этган.

Ҳужумчи қўлга олинган, ҳодиса вақтида АҚШ Махфий хизмати ходимларидан бири яраланган. Президентнинг айтишича, унинг ҳаётини бронжилет сақлаб қолган.