Трамп йирик телеканални судга берди

АҚШнинг собиқ Президенти Дональд Трамп СNN телеканалини ўзига туҳмат қилганликда айблаб, судга берди ва жарима учун 475 миллион доллар талаб қилмоқда. Бу ҳақда “China Daily” хабар берди.

3 октябрь куни АҚШ округ судига берилган 29 саҳифалик даъво аризасида унинг обрўсига “ёлғон ва туҳматга асосланган таърифлар” билан путур етказилгани ва СNN шу орқали унинг сиёсий карьерасига халақит беришни мақсад қилгани иддао қилинган.

СNN телеканалининг собиқ Президентга нисбатан “ирқчи”, “рус малайи” ва “қўзғолончи” сўзларини қўллаши, шунингдек, Трампнинг “2020 йилги президентлик сайлови жараёнининг яхлитлиги ҳақидаги хавотирлар” фикрига “Катта ёлғон” атамасини ишлатиши даъво аризасининг берилишига сабаб бўлди.

Трампнинг адвокатлари “Катта ёлғон” Адольф Гитлер қўллаган тактикага тўғридан-тўғри ишора эканлигини ва Гитлернинг “Mein Kampf” китобида келтирилганлигини таъкидлади.

Даъво аризасида айтилишича, СNN телеканалининг Трампга қарши туҳмат кўринишидаги рағбатлантириш кампанияси сўнгги ойларда авж олди, чунки СNN 2024 йилда Дональд Трамп президентликка номзодини қўйишидан қўрқади.

Трампнинг ОАВни судга бергани биринчи марта эмас. 2020 йилда унинг кампанияси “The Washington Pos”t, СNN ва “The New York Times” газеталарини фикр-мулоҳазалари учун алоҳида судга берган. СNN ва “Times” газеталарига қарши даъво рад этилган, аммо “The Washington Post”га қарши даъво ҳали ҳам кўриб чиқилмоқда.

Мусулмон Зиё