Трамп янги телефон брендига асос солди. У қанча туради?

АҚШ Президенти Дональд Трампнинг оиласи T1 Phone бренди остидаги тилла корпусли смартфон савдосини йўлга қўйишни режалаштираётганини маълум қилди. Бу ҳақда NBC News хабар берди.

Президентнинг ўғиллари Эрик Трамп ва кичик Дональд Трамп томонидан бошқариладиган Trump Organization олтин рангли, 256 Гб ҳажмли Android смартфонини 499 долларга сотишни режалаштирмоқда. Шунингдек, харидорлар 47,45 долларга махсус алоқа пакетини харид қилишлари мумкин бўлади, бу рамзий нарх Трамп АҚШнинг 45-президенти бўлганини ва янги муддатга сайланганидан кейин 47-Президент бўлганини эслатиб туради.

Android асосидаги телефонлар АҚШда ишлаб чиқилгани ва ишлаб чиқарилгани айтилмоқда, бироқ қандай ва қаерда экани номаълум – экспертларнинг таъкидлашича, мамлакатда смартфонлар ишлаб чиқариш учун зарур инфратузилма етарли эмас.

Трампнинг тилла смартфонини “ишлаб чиқариш” қарори Оқ уй раҳбари Apple бош директори Тим Кукка iPhone ишлаб чиқаришини АҚШга кўчириш учун босим ўтказмоқчи бўлган пайтда қабул қилинди. Май ойида Трамп Америкада ишлаб чиқарилмайдиган iPhone’ларга “камида” 25 фоизлик импорт тарифини киритиш билан таҳдид қилган эди.

CCS Insight таҳлилчиси Лео Гебби таъкидлаганидек, АҚШ ҳозирда мамлакатда смартфонларни йиғиш учун зарур бўлган таъминот занжирига эга эмас.

“Бироқ қурилмани хориждан олиб келинган қисмлардан АҚШда йиғиш мумкин”, деган Лео Гебби.

Trump Organization эълонида янги смартфон ишлаб чиқарилиши ҳақида бир нечта тафсилотлар, жумладан, хизматни бошқарадиган бизнес шериги номи ва номни лицензиялаш ҳақида маълумот берилган. Трамп ташкилоти ўз режаларини эълон қилар экан, америкаликлар ҳамёнбоп, юқори сифатли симсиз алоқага лойиқ эканини айтди.

Эълонда хизматнинг мижозларга хизмат кўрсатиш ходимлари АҚШда бўлиши айтилган, шунингдек, энди олдиндан буюртма қилиш мумкин бўлган Т1 телефони олтин рангда бўлиши аниқланган.

Ҳозирда АҚШ мобил бозорида учта асосий ўйинчи мавжуд: AT&T, Verizon ва T-Mobile. Энг мақбул режалар ойига 40 доллардан кам.