Трамп ва Путиннинг Будапештдаги учрашувига қўшилишга тайёрман – Зеленский

Украина Президенти Владимир Зеленский 17 октябрь куни АҚШ Президенти Дональд Трамп билан учрашув пайтида, унинг Россия Президенти Владимир Путин билан Будапештда режалаштирилаётган учрашувига қўшилишга тайёр эканини маълум қилди. Зеленский NBC News'га берган интервьюсида бу масала уларнинг суҳбати давомида кўтарилганини айтди.

“Менинг фикрим шундай: агар ҳақиқий ва барқарор тинчликни истасак, бу фожианинг икки тарафини ҳам жалб қилишимиз керак. Ҳа, у оккупант, лекин Украина азият чекмоқда ва курашмоқда. Албатта, бизни иштирок эттирмасдан, биз ҳақимизда қандайдир келишувлар бўлиши мумкин эмас”, деди Зеленский.

Будапештга бориш ҳақидаги фикри қатъий эканини айтганми, йўқми деган саволга жавобан Зеленский шундай деди:

“Мен жума куни Трампқа айтдим: “Мен тайёрман”.

Шу билан бирга, Украина раҳбари Путиннинг “бу урушни шунчаки тугатишга тайёр” эканига шубҳа билдирди.

Бундан олдин Зеленский Sky News’га берган интервьюсида ҳам Дональд Трамп ва Владимир Путин билан уч томонлама учрашувга тайёрлигини билдирган эди. Унинг сўзларига кўра, Трамп аввал Украина ва Россия раҳбарларининг “бирма-бир, юзма-юз фикр алмашуви”ни таклиф қилган, шундан кейин умумий саммитни ўтказиш ғоясини айтган.

“Мен икки томонлама ҳам, уч томонлама ҳам ҳеч қандай шартларсиз иштирок этишга тайёр эканимни тасдиқладим. Президент Трамп ва Путин билан учрашишга тайёрман. Такрорлайман: ҳа, мен ҳеч қандай олдиндан қўйилган шартларсиз учрашувга тайёрман”, деди Украина раҳбари.