Трамп уйсизларни Вашингтондан қувмоқчи

АҚШ Президенти Дональд Трамп уйсизларни Вашингтондан узоқроққа кўчириш ниятида эканини маълум қилди. Бу ҳақда у кеча, 10 август куни Truth Social ижтимоий тармоғида ёзди.

“Мен пойтахтимизни хавфсиз ва чиройли қилмоқчиман. Уйсизлар дарҳол кетиши керак. Биз сизларга яшаш жойлари берамиз, лекин пойтахтдан узоқда”, дея ёзган Трамп. 

У жиноятчиларга ҳам мурожаат қилиб, уларга ҳеч қаерга кетишга ҳожат йўқлигини, чунки уларни “ўз жойи бўлган қамоққа” юборишларини айтган. Президентнинг таъкидлашича, барча чоралар ноқонуний мигрантлар масаласидаги каби тезкор амалга оширилади.

“Сўнгги бир неча ойда биз миллионлардан нолга тушдик. Энди ҳам шундай бўлади – тайёр туринг! Биз пойтахтимизни қайтаришни истаймиз”, дея ёзган давлат раҳбари. 

“The Washington Post” газетасининг ёзишича, АҚШ Президенти маъмурияти унинг ҳокимиятга келган илк йилида 1 миллионгача мигрантни депортация қилишни режалаштирган.

Нашр манбаларига кўра, Ички хавфсизлик вазирлиги ва бошқа федерал идоралар ходимлари аллақачон 1,4 миллион кишининг бир қисмини чиқариб юбориш йўлини топишга ҳаракат қилмоқда. Аммо бу ишни амалга ошириш мушкул, чунки уларнинг ватани мигрантларни қабул қилмаяпти. АҚШ учинчи давлатлар билан депортация қилинганларни қабул қилиш бўйича ҳам музокара олиб бормоқда.

Эслатиб ўтамиз, аввалроқ АҚШ Президенти Дональд Трамп мамлакатдаги ноқонуний мигрантларга қарши курашни бошлагач, уларнинг сони деярли бир миллионга камайгани ҳақида хабар берилганди.