Трамп Сурияга қарши санкцияларни расман бекор қилди

Кеча, 30 июнь куни АҚШ Президенти Дональд Трамп Сурияга қарши жорий этилган иқтисодий санкцияларни бекор қилиш тўғрисида фармонни имзолади. Ушбу қарор “барқарорлик ва тинчлик сари йўлдаги қадам” сифатида изоҳланди. Бу ҳақда Оқ уй баёнот берди.

“АҚШ барқарор, бир бутун ва ўзи ҳамда қўшнилари билан тинч-тотув яшайдиган Сурияни қўллаб-қувватлашга содиқдир. Ягона Сурия – террористик ташкилотларга бошпана бермайдиган, диний ва этник озчиликлар хавфсизлигини таъминлайдиган Сурия минтақавий хавфсизлик ва фаровонликни мустаҳкамлаши мумкин”, дейилади фармонда.

Россияга қочган Сурия собиқ президенти Башар Асад, унинг оила аъзолари ва ағдарилган тузум тарафдорларига нисбатан санкциялар амалда қолмоқда.

Оқ уй баёнотида айтилишича, АҚШ янги Сурия ҳукумати ҳаракатларини, жумладан, “Исроил билан муносабатларни нормаллаштиришга қаратилган аниқ чораларни” кузатиб боради.

Муваққат Сурия ҳукуматининг ташқи ишлар вазири Асад ал-Шибоний санкцияларнинг бекор қилиниши Сурия иқтисодиётини тиклаш йўлидаги тўсиқларни бартараф этишини ва мамлакатни халқаро ҳамжамият учун очишини билдирган.

АҚШ Молия вазири Скотт Бессент баёнотида фармон Сурия халқига “Башар Асаднинг золим режими ағдарилгач, ҳаётни янгидан бошлаш имконини беради”, дейилади.

“Бугунги қарорлар Сурия иқтисодиётини глобал савдога қайта боғлаш ва мамлакат инфратузилмасини тиклаш имконини яратади”, дейди у.

Эслатиб ўтамиз, Трамп Сурияга нисбатан санкциялар жорий йилнинг май ойида, янги Сурия етакчиси Аҳмад аш-Шара билан Ар-Риёдда учрашувдан олдин олиб ташлашини билдирган эди.

Аҳмад аш-Шара бошчилигидаги гуруҳ ҳужуми ортидан ўтган йил декабрь ойининг бошида Башар Асад режими ағдарилган эди.