Трамп сенатор билан кескин баҳслашиб қолди

Кеча, 24 июнь куни АҚШ Президенти Дональд Трамп Эрон уруши масаласида республикачилар иштирокидаги ёпиқ йиғилишда сенатор Билл Кэссиди билан баҳслашиб кетди. Бу ҳақда “Reuters” хабар қилди.

Республикачи сенатор Кэссиди маъмуриятдан Эрон билан ўтган ҳафта имзоланган келишув бўйича батафсил тушунтириш талаб қилган. Унинг таъкидлашича, келишув Эрон учун молиявий имтиёзларни назарда тутса-да, уруш бошланишида белгиланган мақсадларга эришилмаган.

“Америка халқига ҳозир айтилаётганидан кўра кўпроқ маълумот керак. Жараён бизга айтилган йўналишда кетаётгандек кўринмаяпти” деган сенатор.

Баҳс Сенат Трампни урушни тўхтатишга чақирувчи рамзий резолюцияни қабул қилганидан бир кун ўтгач юз берган. Кэссиди ушбу ҳужжатни қўллаб-қувватлаган тўрт нафар республикачи сенатордан бири бўлган.

Кейинчалик Трамп Сенат қарори аҳамиятсиз эканини таъкидлаган.

“Эрон буни кўради ва “бу нима дегани ўзи?” деб ўйлайди. Ахир, биласиз-ку, бунинг ҳеч қандай аҳамияти йўқ, тўғрими?” деган Трамп Оқ уйда журналистларга.

Орадан бир неча соат ўтгач, маъмурият Конгрессдан уруш харажатларини қоплаш учун қўшимча 70 миллиард доллар ажратишни сўраган. Бу маблағ АҚШнинг 867 миллиард долларлик ҳарбий бюджетига қўшимча равишда талаб қилинган.

24 июнь куни кечқурун эса сенатор Кэссиди X ижтимоий тармоғидаги саҳифасида вице-президент Жей Ди Вэнс ва махсус вакил Стив Уиткоффга “Эрон бўйича бугун тушдан кейин ўтказилган батафсил брифинг” учун миннатдорлик билдирган. Унинг айтишича, Оқ уй унинг хавотирларига тезкор муносабат билдирган.

“Хавотирларимнинг кўпига жавоб бериш учун Оқ уйга тезкор таклиф қилинганини қадрлайман” деган Кэссиди.

Эслатиб ўтамиз, аввалроқ Президент Дональд Трамп Италия Бош вазири Жоржа Мелони билан ҳам можарога учраган эди.