Трамп Россияга қарши “дўзох санкциялари”га “яшил чироқ” ёқди

АҚШ Президенти Дональд Трамп Россияга қарши янги санкциялар ҳақидаги қонун лойиҳасига “яшил чироқ” ёқди. Бу ҳақда бугун, 8 январь куни мазкур ташаббус муаллифи, республикачи сенатор Линдси Грэм Х ижтимоий тармоғида маълум қилди.

“Овоз бериш чоғида кучли икки партиявий қўллаб-қувватлашга умид қиламан, балки бу ҳатто келаси ҳафтадаёқ содир бўлар”, деб ёзди сенатор.

Унинг билдиришича, бу “ўз вақтида” бўлади, чунки Украина тинчликка эришиш учун ён бераётган бир пайтда Владимир Путин “фақат гап билан чекланиб, бегуноҳ одамларни ўлдиришда давом этмоқда”.

“Бу қонун лойиҳаси Президент Трампга Хитой, Ҳиндистон ва Бразилия каби давлатларга таъсир ўтказиш учун улкан имконият беради – уларни Путиннинг Украинага қарши қонли урушини молиялаштираётган арзон Россия нефтини сотиб олишни тўхтатишга ундайди”, дея изоҳ берган Грэм.

Гап “дўзох санкциялари” ёки “яксон қилувчи санкциялар” номи билан танилган ташаббус ҳақида бормоқда. У АҚШ томонидан Россиянинг нефть, газ, уран ва бошқа хомашёсини сотиб олаётган давлатлардан импорт қилинадиган маҳсулотларга 500 фоизлик бож жорий этишни назарда тутади.

Қонун лойиҳаси илк бор 2025 йил апрелида сенаторлар Линдси Грэм ва Ричард Блюментал томонидан тақдим этилган. Бироқ Трамп Сенатдаги республикачилардан уни вақтинча овозга қўймасликни сўраган. “Reuters”нинг Оқ уйдаги манбаларига кўра, ўшанда АҚШ Президенти Украина масаласида Путин билан “самарали музокаралар” олиб боришга умид қилган. Шунингдек, у уруш якунлангач, АҚШ Россия билан иқтисодий ҳамкорликни бошлаши мумкинлигига ишонч билдирган.

2025 йил октябрь ойида Москва ва Вашингтон ўртасидаги музокаралар бир неча раунддан кейин ҳам давом этаётган бир пайтда, Сенатдаги республикачилар етакчиси Жон Тьюн санкциялар ҳақидаги қонун лойиҳаси бир ой ичида овозга қўйилиши мумкинлигини айтган. Ноябрь ойида эса Грэм Трамп ташаббусни илгари суриш бўйича топшириқ берганини билдирган. Бироқ шундан сўнг ҳам ҳужжат сенаторлар томонидан кўриб чиқилмаган.

“The Washington Post” нашри қонун лойиҳаси муҳокамаси фонида унинг қабул қилиниши Россиядан кўра АҚШнинг ўзига кўпроқ зарар етказиши мумкинлигини қайд этган. Сабаби, Россия энергетика ресурсларини Вашингтоннинг кўплаб муҳим ҳамкорлари, жумладан Европадаги давлатлар ҳам сотиб олади. Оқибатда АҚШ ўзини айрим йирик иқтисодиётлардан узиб қўйиши мумкин.

Эслатиб ўямиз, аввалроқ АҚШ томонидан нефть соҳасидаги энг йирик компаниялар – “Роснефть” ва “Лукойл”га қарши жорий этилган санкциялар фонида Россиянинг асосий экспорт нефти бўлган Urals маркали нефть нархи баррелига тахминан 34 долларгача пасайгани ҳақида хабар берилган эди.