Трамп Путин билан Исроил-Эрон масаласини муҳокама қилди

Россия ва АҚШ етакчилари Владимир Путин ва Дональд Трамп навбатдаги телефон мулоқотни ўтказди. Бу ҳақда журналистларга Президент Путиннинг халқаро масалалар бўйича ёрдамчиси Юрий Ушаков маълум қилди.

“Мазмунли, очиқ ва фойдали суҳбат бўлди. Яқин Шарқдаги вазият бўйича фикр алмашилди. Владимир Путин Исроилнинг Эронга қарши ҳарбий операциясини танқид қилди ва конфликтнинг янада кучайиши мумкинлигига жиддий ҳавотир билдирди”, деган Ушаков. 

Кремль матбуот котиби Дмитрий Песков ҳам телефон суҳбати бўлиб ўтганини тасдиқлади. Путин Америка Президентига кеча ўтказилган Исроил Бош вазири Биньямин Нетаньяху ва Эрон Президенти Масъуд Пезешкиён билан ўтказилган телефон суҳбати ҳақида маълум қилди ва конфликтни янада ўсишини олдини олиш учун Россия томони ўртада медиаторлик ҳаракатларини қилишга тайёрлигини билдирди. Улар қийинлашган вазиятга қарамасдан Эрон ядро дастури бўйича музокоралар столига қайтишни иснисно қилмади. Трамп маъмурияти Эрон расмийлари билан музокоралар ўтказишга тайёрлигини билдирган.

Шунингдек, Путин Трампга жорий йил 2 июнда Туркияда бўлиб ўтган Россия Украина келишилган мажбуриятларни бажариш ҳақида эслатиб ўтди. Хусусан ҳарбий асирлар алмашинуви шу кунларда амалга оширилаётганини маълум қилди.

Трамп ҳам Россия-Украина конфликти тезда ҳал қилинишини хохлашини айтган.

Россия ва АҚШ раҳбарларининг телефон суҳбати 50 дақиқа давом этган.

“Суҳбат тахминан бир соат, аниқроғи, 50 дақиқа давом этди. Маълумотли, самимий ва энг муҳими, жуда фойдали бўлди”, деган Ушаков.

Эслатиб ўтамиз, жорий йилнинг 4 июнь куни ҳам АҚШ Президенти Дональд Трамп Россия Президенти Владимир Путин билан телефон орқали мулоқот қилганди ва унда Украина томонидан Россиядаги аэродромларга уюштирилган ҳужумлар муҳокама марказида бўлганди. Суҳбат давомида томонлар Эроннинг ядровий дастури билан боғлиқ вазиятни гаплашганди.