Трамп ортидан Нетаньяхуга ҳам суиқасд уюштирилиши мумкин – “Times of Israel”

АҚШнинг 45-президенти Дональд Трампга 13 июль куни уюштирилган суиқасддан сўнг, Исроил Бош вазири Биньямин Нетаньяхуга ҳам суиқасд қилиниши мумкин. Бу ҳақда “Times of Israel” газетаси ёзмоқда.

Нашрга кўра, Исроил расмийлари мамлакат Бош вазирининг ҳаётига суиқасд қилиниши мумкинлигидан хавотирга тушмоқда. Исроил Вазирлар Маҳкамаси котиби Йоси Фукс кеча, 14 июль куни Қуддус шаҳрида бўлиб ўтган ҳафталик йиғилиш вақтида ҳукуматга мухолифат шахслар томонидан тасвирга олинган Нетаньяхуга қарши танқидий видеолар тасмасини мажлис иштирокчиларига кўрсатиб, уни муҳокама қилган. Йиғилишдан бир кун олдин Трамга қилинган тажовузни кўз олдига келтирган Исроил ҳукумати вакилларида Бош вазирга ҳам худди шу кўринишдаги суиқасд бўлиши эҳтимолидан хавотир бошланган.

Шунингдек, 2 соат давом этган йиғилишда вазирлар адлия тизими, ҳуқуқ-тартибот органлари ва Бош прокурорга жамоатчилик вакилларининг Нетаньяху ва унинг оиласига қарши зўравонлик ҳолатлари ҳамда унинг сиёсатига қарши намойиш чуқур ўрганилмагани учун танбеҳ берилган.

Газета эса бу йиғилишдан асосий мақсад – Бош вазирга қарши бўлиб ўтган намойишни таҳлил қилиб, унга ечим топиш эмас, аксинча, Трамп воқеаларидан кейин Нетаньяху шахсини ҳимоялаш ҳар қачонгидан долзарблигини ҳукумат аъзоларига етказиш бўлганини ёзган.

Маълумот учун, республикачи Трампга уюштирилган суиқасддан сўнг, уни отган одамнинг шахси очиқланди. Суиқасдни Бетел-Парк шаҳарчасида яшовчи 20 ёшли Томас Мэттью Крукс уюштиргани маълум бўлди. АҚШ президентлигига номзоднинг ҳаётига қилинган тажовузга Украина Президенти Владимир Зеленскийдан тортиб, SpaceХ асосчиси Илон Масккача ҳамма лидерлар ўз муносабатини билдирди. Шунингдек, Президент Шавкат Мирзиёев ҳам ҳужумни қоралаб, унга соғлиқ тилади. “New York Post” газетасига берган интервьюсида Трамп суиқасд оқибатида ҳалок бўлиши мумкинлиги, аммо мўъжиза юз берганини айтди.