Трамп Нетаньяхуни Қатарга нисбатан эҳтиёт бўлишга чақирди

АҚШ Президенти Дональд Трамп Исроил Бош вазири Биньямин Нетаньяхуни Қатарга нисбатан “ўта эҳтиёткор бўлишга” чақирди. Бу ҳақда у кеча, 14 сентябрь куни Нью-Йоркдан Вашингтонга учаётган самолёт бортида журналистларнинг саволларига жавобан маълум қилди.

“Исроил ва бошқалар эҳтиёт бўлишлари керак. Бирор жойга зарба берганда эҳтиёт бўлиш керак”, деди Оқ уй раҳбари.

Қатарга яқинда уюштирилган ҳужум муносабати билан Нетаньяхуга қандай хабарни етказмоқчи эканлиги ҳақидаги саволга Америка етакчиси Исроил ҲАМАСга қарши бирор нарса қилиши кераклигини, аммо Қатар АҚШнинг муҳим иттифоқчиси эканини таъкидлади.

Трамп, шунингдек, Қатар Амири Шайх Тамим бин Ҳамад Ол Соний билан суҳбати ҳақида гапириб, уни “ажойиб инсон” деб атади.

“Мен унга жамоатчилик билан алоқаларини яхшилашлари кераклигини айтдим, чунки улар бу борада унчалик яхши эмас. Одамлар улар ҳақида ёмон гапиришади, лекин бундай қилмаслик керак”, деди Америка раҳбари.

Қатарни қўллаб-қувватлаётганини таъкидлаган Трамп, Доҳани Вашингтоннинг “ажойиб” иттифоқчиси деб атади ва Қўшма Штатлар бу давлат билан жуда яхши муносабатларни сақлаб қолиш ниятида эканини айтди.

“Биз Қатарни тўлиқ қўллаб-қувватлаймиз. Улар қимматли иттифоқчи. Уларнинг позицияси қийин, чунки улар воқеалар марказида, аммо Қўшма Штатлар учун улар ишончли шерик бўлиб қолмоқда”, дея таъкидлади Президент.

Эслатиб ўтамиз, АҚШ Президенти Дональд Трамп 12 сентябрь куни Қатар Бош вазири ва Ташқи ишлар вазири Муҳаммад бин Абдулраҳмон Ол Соний билан учрашганди. Оқ уй Президент Трамп режалаштирилганидек, Қатар Бош вазири билан бирга овқатланганини тасдиқлаган. Бироқ учрашувда нималар муҳокама қилинганига аниқлик киритилмаган.