Трамп маъмурияти канадалик сепаратистлар билан яширин алоқада бўлган – FT

АҚШ Президенти Дональд Трамп маъмурияти Канаданинг Альберта вилояти мустақиллигини қўллаб-қувватловчи “Alberta Prosperity Project” (APP – “Альберта фаровонлиги лойиҳаси”) гуруҳи вакиллари билан бир неча бор яширин учрашувлар ўтказган. Бу ҳақда Вашингтон ва Канададаги манбаларига таяниб, “Financial Times” хабар берди.

Нашр маълумотларига кўра, учрашувлар 2025 йилда ва 2026 йил бошида бўлиб ўтган ҳамда уларда АҚШ Давлат департаменти ходимлари иштирок этган. APP вакиллари Альберта мустақиллиги бўйича эҳтимолий референдум истиқболлари, шунингдек энергетика ва хавфсизлик масалаларини муҳокама қилган. Ҳаракат етакчилари алоқалар “юқори даражада” бўлганини таъкидлайди, бироқ бунинг расмий тасдиғи йўқ.

Оқ уй ва Давлат департаменти учрашувлар бўлганини тасдиқлаган, бироқ улар сепаратизмни қўллаб-қувватлашни англатмаслигини ва Вашингтон зиммасига молиявий ёрдам ёки сиёсий тан олиш каби ҳеч қандай мажбурият юкламаслигини алоҳида қайд этган.

Канадада бу алоқалар ҳақидаги маълумот жамоатчиликда резонанс келтириб чиқарган. Қатор сиёсатчилар ва экспертлар буни мамлакат ички ишларига эҳтимолий аралашув сифатида баҳолаган. Шу билан бирга, Альберта вилояти расмий ҳокимияти айрим сепаратистик гуруҳлар фаоллигига қарамай, Канададан чиқиш ғоясини расман қўллаб-қувватламайди.

Маълумот учун, “Alberta Prosperity Project” — Альберта суверенитети ва вилоятнинг энергетика ресурслари устидан назоратини кенгайтириш ғояларини илгари сурувчи ижтимоий-сиёсий ҳаракат. Канада ОАВ маълумотларига кўра, мустақилликни қўллаб-қувватлаш ҳозирча тор доирадаги кайфият бўлиб, минтақа аҳолиси орасида кўпчиликни ташкил этмайди.